Sekuvinjwe inqwaba engena kuleli ngokungemthetho
Njengoba unyaka usuya ngasemaphethelweni kuthiwa baningi abantu abasuka emazweni angomakheowane abangena eNingizimu Afrika ngokungemthetho ngesizathu sokuthi bazothenga izimpahla zokudayisa ngamaholidi kaKhisimusi kanti sebengena unomphelo.
Muva nje abangena kuleli ngokungemthetho basebenzisa izintuba ezisemngceleni oxhumanisa elakuleli neBotswana bajombele eNorth West.
Selokhu kuqokwe uMnu uSihle Zikalala njengoNgqongqoshe Wezemisebenzi Yomphakathi Nengqalasizinda, kuthiwa kwehlile ukucanasa kwabantu bangaphandle abebengena bephuma kalula eBeitbridge ngenxa yokuguga kocingo olubiyile nokungaqini komthetho.
Emizamweni yokuvimba ukuthutheleka kwabantu bangaphandle bengenawo amaphepha asemthethweni, sekutshalwe uphiko lombutho wezokuvikela eNorth West ngaphansi komkhankaso obizwa nge-Operation Corona.
Kulo mngcele kutshalwe uphiko iSA Army Reserve Force, Durban Light Infantry (DLI). Lo mkhankaso uzothatha izinyanga ezine usongwe maphakathi noZibandlela lapho abantu abaningi sebesemakhaya ngamaholidi.
Selokhu kutshalwe lolu phiko lwaseThekwini kulo mngcele, sekuvinjwe abantu abaphuma ngaphandle abangaphezulu kwama-200 abasuke hezama ukungena eNingizimu Afrika ngokungemthetho.
Ngokusho kwabeSANDF iningi lababanjiwe ngabesifazane. Uma sebeboshiwe batshela abomthetho ukuthi basuke bezothenga impahla yokudayisa, kodwa ziyime emthumeni uma sekufanele bakhiphe amapassport nezinye izincwadi ezibachazayo.
Isitatimende siqhuba sithi uma kubonakala ukuthi ubugebengu abehli, amasosha azoqhubeka nokukanisa kule ndawo kuze kube ngunyaka ozayo.
Ngesonto eledlule lolu phiko lezokuvikela oluzinze kwelikaMthaniya luvundulule insangu engadayiswa imali engama-R650 000 ngokwentengo yasemgwaqeni ebisuka eBotswana ishushumbiselwa kuleli.
Ngesikhathi esifanayo kuphinde kwabanjwa ugwayi odayiswa ngokungekho emthethweni wezigidi eziningi-13 obuzongeniswa kuleli, kuthiwa ubuyodayiswa eGoli.
UCaptain Nkabinde walolu phiko uthe kubanjwe nezimoto okuthe uma kuhlanganiswa intengo yazo yafinyelela kuma R750 000 zebiwe kuleli ziyiswa emazweni angomakhelwane.
Ngokusho kukaNkabinde ezinye izimoto ezine ezibanjwe kwenye ingxenye yomngcele bezisetshenziselwa ukulayisha impahla eyebiwe iphuma kuleli iya eBotswana.