U-Akpeyi angase avumbuke ezintini zoSuthu
Iqembu i-AmaZulu Football Club selilande unozinti ozakhele igama ku-Orlando Pirates nakuMamelodi Sundowns, uWayne Sandilands.
Le ngwazi eke yavimba nakuBafana Bafana izovala indawo kaMusa Langa osebuyiselwe eqenjini lenkulisa. Wanyuselwa eqenjini elikhulu ngesikhathi Usuthu lumisa uRoman Folz njengomqeqeshi.
ElaboHlanga lihoshe ngomthombo walo othembekile ukuthi uSandilands nguyena osenikwe isikhundla sokupheka onozinti oSuthwini. “USandilands useqede yonke into noSuthu. Useqalile ukusebenza. Ngikhuluma nawe nje usekhempini neqembu eMgungundlovu. Usayine inkontileka yeminyaka emithathu neqembu,” kuchaza lo mthombo. Ngesizini edlule ubesemabhukwini eMaritzburg United egcine igawulwe yizembe.
“USandilands uvele usehambise nohla lonozinti afuna basayiniswe yiqembu. AmaZulu abheke ukuqinisa ezintini,” kuqhuba umthombo othembekile. UVeli Mothwa nguyena okuvalwe isizini ezitamuzela ngejezi. NgoMasingana iqembu like laboleka uJody February kuMamelodi Sundowns.
“Onozinti abagaqelwe nguSuthu kukhona igama likaSiyabonga Mpontshane, uDaniel Akpeyi noKing Ndlovu. Izingxoxo zivele seziqalile phakathi kuka-Akpeyi naleli qembu. Ngemuva kokwelula inkontileka ka-Akpeyi ngeminyaka emibili lo mdlali ube esethumela izimfuna zakhe. Iqembu likhale ngokumpitsheka ephaketheni labe seliyalela imenenja yakhe ukuthi imtholele iqembu elizomnika lokhu akufunayo. Nangempela yenze njalo njengoba ibuye noSuthu. NgoMsombuluko iyazisile iSwallows ngendaba yokufunwa kuka-Akpeyi. NgoLwesibili izikhulu zeSwallows bezinomhlangano zibhunga ngendaba ka-Akpeyi,” kuchaza umthombo.
UMpontshane usanda kuvuselela inkontileka yakhe ngonyaka kweZimnyama, uzobanga ijezi noRichard Ofori, Sipho Chaine noMelusi Buthelezi.
“Ezinye izindaba ezinhle ngo-Akpeyi wukuthi usewatholile amaphepha akhe amgunyazayo ukuthi abe yisakhamuzi saseNingizimu Afrika njengoba eseqede iminyaka engaphezu kwemihlanu afika kuleli. Wafaka isicelo ngoZibandlela. NgoLwesibili uyitholile impendulo okusho ukuthi uSuthu angeke lube nenkinga uma lugcina lumsayinisa. ISwallows ayizimisele nokho ukumdedela busende. Ifuna okungenani ukuthi kubekhona ekutholayo kuMaZulu. Izolo bekubhekwe ukuthi amaqembu womabili aqale axoxisane. Eyokushintshwana ngabadlali nayo ike yakhulunywa,” kuchaza umthombo. Ezinye izindaba ezithina Usuthu ukuthi uSihlalo walo uSandile Zungu, uhalela uSibongiseni “OX” Mthethwa kuleli qembu.
“UZungu akakufihli ukuthi ufuna uMthethwa, okubi ngalo mdlali neKaizer Chiefs iyamfuna kanti iStellenbosch FC kubukeka kunzima ukuba imdedele” kusho umthombo.