Ukuvulwa kwewindi kuza noshintsho emaqembini
Alokhu eqhubeke njalo amaqembu agijima kuPremier Soccer League (PSL) nokuqinisa izikwati zawo ngaphambi kokuqala kwesizini entsha.
Intatheli yelaboHlanga uZipho Singela isibhekela izindaba zokuhwebelana ngabadlali emaqenjini ahlukahlukene.
Lebogang Mabotja: Ugcine esayine neSekhukhune United uLebogang “Bibo” Mabotja obegijima kuMarumo Gallants.
Leli nxele belifunwa uthuli yiRoyal AM kodwa wagcina esayine neSekhukhune engazwile emakethe.
ElaboHlanga lihoshe izindaba zokuthi uMabotja usayine inkontileka yonyaka ehambisana nombandela wokuthi yelulwe ngomunye unyaka uma isiphela.
Mandla Ncikazi: I-Orlando Pirates yale yaphetha ukudedela uMandla Ncikazi osethimbeni labaqeqeshi kuleli qembu.
ElaboHlanga lithole izindaba zokuthi iRichards Bay Football Club isale ididekile iPirates inqaba ukudedela uNcikazi.
Usihlalo weRichards Bay uJomo Biyela ubesevumelene noNcikazi ngezimfuno zakhe. Obesekusele wukuthi eZimnyama zimkhulule.
IBay ayinaye umqeqeshi. USiboniso Gumede nguyena osabambe izintambo. Ukunqaba kwePirates noNcikazi kuphazamise izinhlelo zeBay ebimemezele ukuthi uzokwethula umqeqeshi ngoMsombuluko.
UBiyela uzamile ukuxoxa noLuc Eymael noDylan Kerr kodwa bangavumelana ngemali. Uphinde wathinta noCedric Kaze kodwa wagcina ebhala ecisha. Njengamanje sekuvela ukuthi iBay ixoxa nomunye umqeqeshi waseNhla ne-Afrika.
Maritzburg United: Isiqalile ukuthungatha umqeqeshi omusha iMaritzburg United egawulwe yizembe kuDSTV Premiership.
ElaboHlanga lithole izindaba zokuthi izikhulu zeTeam of Choice zithathe isinqumo sokuthi ziqhubeke neqembu.
Emhlanganweni obungoLwesihlanu olwedlule iTeam of Choice ithathe isinqumo sokuthi iqembu lizame ukunyukela phezulu.
Leli phephandaba lithole ukuthi uPitso Dladla noPapi Zothwane basohlwini lwabaqeqeshi abasethubeni lokuthola umsebenzi wokucija iMaritzburg.
Ruud Krol: Ugcine ephuthwe ngumsebenzi wokucija iYoung Africans ngenxa yokufuna itshe lemali uRuud Krol.
ElaboHlanga lithole ukuthi uKrol ubefuna izizumbulu kuYanga okwenze izingxoxo zasheshe zaphela phakathi kwakhe naleli qembu laseTanzania.
ElaboHlanga lithole lezi zindaba ngomthombo walo othembekile ukuthi iYanga igcine iphoqeleka ukuthi iqashe uMiguel Gamondi obengabizi.