Kushiyana ukwenza emaqenjini ngabadlali nabaqeqeshi

Aseqalile amaqembu agijima kuPremier Soccer League (PSL) ukuqinisa izikwati zawo ngaphambi kwesizini ka-2023/24.

ElaboHlanga lizokulethela zona zishisa njalo ngoLwesihlanu. Intatheli esimkatshubomvu uZipho Singela uphansi phezulu uzihogela ei-Afrika yonke ezakamuva zokuhwebelana ngabadlali.

• UDaniel Akpeyi:

NgoMsombuluko, iSwallows FC ibhalele imeneja ka-Akpeyi, uMinenhle Mkhize iyazisa ukuthi seyelule inkontileka yalo mdlali waseNigeria ngamasizini amabili. UMkhize uziqinisekisile lezi zindaba kwelaboHlanga. Lo nozinti ubegaqelwe yiRoyal AM, iMaritzburg United neSimba FC yaseTanzania. Ubambe elikhulu iqhaza ivika izembe. Udlale imidlalo eyisishiyagalombili kwathi kwemihlanu akangangenelwa yigoli.

• UCohen Stander:

Inkontileka yakhe neCape Town Spurs iyaphela uma kuphela isizini. Usenelungelo lokusayina inkontileka yesibambiso neqembu alithandayo. Njengamanje ugaqelwe yiRoyal AM neSwallows. Izingxoxo sezikuvuthondaba neRoyal AM.

• URiaan Hanamub:

Izimpimpi zelaboHlanga sezihlebele leli phephandaba ukuthi AmaZulu aseqede konke ne-Orlando Pirates ngaye. Lo mdlali odlala ngakwesokunxele emuva ubebanga noLebogang Mabotja weMarumo Gallants. Izikhulu zePirates zigcine zikhethe ukusayinisa leli nxele laseNamibia ngenxa yeminyaka yalo (29).

• URamahlwe Mphahlele:

AmaZulu athathe isinqumo sokulula inkontileka yakhe ngesizini. Leli qembu lithathe isinqumo sokusebenzisa umbandela wokuyelula. Ubegaqelwe iSekhukhune United. ElaboHlanga lithole ngemithombo yalo engashayi eceleni ukuthi uhlangane nosihlalo weqembu uSandile Zungu ngoLwesithathu.

• ULebogang Mabotja:

Iyavutha indlela yakhe ebheke kuRoyal AM. Lo mdlali oyibamba ngakwesokunxele emuva kuvela ukuthi ubebambe umhlangano nezikhulu ziThwihli Thwahla emahhotela aphambili eGoli ngempelasonto naphakathi nesonto lapho bebedingida khona inkontileka yakhe. ElaboHlanga lithola nezindaba zokuthi iSekhukhune imcuthele lo mfana waseTembisa kodwa kubukeka ezogcina ephelele eThekwini.

• UDumsani Zuma:

Inkontileka yakhe noSuthu iyaphela ngenyanga ezayo. ElaboHlanga lithole ukuthi Usuthu lugcine lusebenzise umbandela wokwelula inkontileka yakhe.

• UWashington Arubi:

Angase aphelele kuSekhukhune United unozinti waseZimbabwe. Lo nozinti obegijima kuMarumo Gallants egawulwe yizembe usethole isicelo kuSekhukhune efuna ukuqinisa ngaye isikwati sayo. Ushaye  into ecokeme kuGallants ngesikhathi ifinyelela kowandulela amanqamu eCaf Champions League. ElaboHlanga lithole ukuthi sekusele kancane aqede neSekhukhune United.

• UKgatsatsho Mariba:

Uzakhele udumo kuVenda Football Academy kuNedbank Cup ngesikhathi ibhekene ne-Orlando Pirates. Ubesalelwe yinkontileka yeminyaka emibili kuleli qembu. Usayine inkontileka yeminyaka emithathu kuSekhukhune eshaye iphakethe yamthenga kuVFA.

• UKgomotso Mosadi:

ElaboHlanga lihabule izindaba zokuthi ubefunwa yiTS Galaxy FC neSekhukhune United. Nokho imali econsisa amathe ayithenjiswa yiSekhukhune iyona ezokwenza agcine ephelele kuBabina Noko.

• UFiston Mayele:

IChiefs igodola nemali. Iqembu  agijima kulona iYanga lifuna u-R10 million ukuze idedele lo mdlali. IChiefs iqale izingxoxo neqembu lakhe. IChiefs ivele yabaleka ngemuva kokuvela kwesamba.

• UMohamed Hussein:

Izingxoxo kubukeka sezifike kwa ngqi ngetshe phakathi kweChiefs nabaphathi bakhe. IChiefs kudala imgaqele lokaputeni weSimba FC yaseTanzania. Emasontweni amathathu edlule iChiefs icele izimfuno zikaHussein. Nangempela abaphathi bakhe bazithumele kuChiefs. Ngemuva kwalokho iChiefs ivele yadonsa izinyawo. Njengamanje uHussein usexoxa naMaZulu. AmaZulu azohlukana noHanamub. UHussein kungenzeka agcine evala isikhala sakhe.

• UKatlego Otladisa:

Okwamanje akukacaci ukuthi uzogcina ephelele kuliphi iqembu. Ufunwa uthuli yi-Orlando Pirates, AmaZulu neSekhukhune United. Iqembu lakhe iMarumo Gallants igawulwe yizembe esigabeni esikhulu. Womathathu la maqembu asezifakile izicelo ku-Otladisa.

• ULuc Eymael:

Kungenzeka avumbuke kuMaZulu FC. Imenenja yakhe ithumelele Usuthu incwadi yesicelo somsebenzi. Usihlalo weqembu, uSandile Zungu usithandile isicelo kodwa akakasithathi isinqumo. Izolo u-Eymael nemenenja yakhe bebenomhlangano noZungu.

  UManqoba Mngqithi:

Ayevumelene ngakho konke noSuthu ngemuva komhlangano abanawo neqembu ngoMasingana. Lo mqeqeshi odabuka eMzimkhulu ubefuna ukushiya kuSundowns. Ekuqaleni kwesizini wehlisiwe esikhundleni sakhe. Ungene ezingxoxweni noSuthu bavumelana ngomlomo ukuthi uzolijoyina iqembu ngesizini ezayo. ElaboHlanga lihoshe izindaba zokuthi izinto sezishintshile. Umphathi weqembu uPatrice Motsepe akafuni ashiye kulandela ukuhluleka kweqembu ukunqoba iCaf Champions League.