Useyibekile induku ebandla kwezekhilikithi umfo kaBavuma
Uyakhombisa ukuthi ungukaputeni uma ehlela iqembu lakhe
Usebalwa nezingqwele zabadlali emhlabeni jikelele ukaputeni wamaProteas uTemba Bavuma ovutha engabaselwe emidlalweni yosuku olulodwa onyakeni we-2023.
UBavuma uzihambela yedwa emidlalweni yosuku olulodwa. Njengamanje uhlezi endaweni yesihlanu emhlabeni jikelele kubadlali asebeqoqe inqwaba yama-runs kulo nyaka.
Ngemuva kwemidlalo eyisithupha kweyosuku olulodwa uBavuma usebhalise ebhodini ama-runs angama-420.
Kulolu hla lwabadlali asebeshaye inqwaba yama-runs onyakeni omusha uBavuma nguyena osedlale imidlalo emincane. Eqhulwini kukhona uShubman Gill waseNdiya ngama-runs angu-624 emidlalweni eyisishiyagalolunye. Unamakhulu amathathu no-50 owodwa.
Endaweni yesibili kukhona u-Asif Khan wase-United Arab Emirates (UAE) ngama-runs angama-538 emidlalweni eli-14. Unamakhulu amabili no-50 abathathu.
Uzakwabo uMuhammad Waseem uyibambe kweyesithathu ngama-runs angama-482 emidlalweni eli-14. Lesi sibalo sama-runs sakhiwe o-50 abathathu nekhulu elilodwa.
Ingwazi yomdlali waseNdiya, uVirat Kohli ushaya ngama-runs angama-427 emidlalweni eyisishiyagalolunye. Useshaye amakhulu amabili no-50 owodwa.
UBavuma uhlezi endaweni yesihlanu. Bahlukaniswe ama-run ayisikhombisa noKohli. Unamakhulu amabili no-50 owodwa.
Intatheli yelaboHlanga uZipho Singela isihlaziyela umdlalo nomdlalo osadlalwe nguBavuma onyakeni ka-2023 kweyosuku olulodwa.
Mhla zingamashumi amabili nesikhombisa kuMasingana ngowezi-2023:
- SA v England: Bavuma (36):
UBavuma ukhishwe esenze ama-runs angama-36 emabholeni angama-28 kulo mdlalo amaProteas awunqobe ngama-runs angama-27 eMangaung Oval esifundazweni saseFree State edolobheni iBloemfontein.
Mhla zingamashumi amabili nesishiyagalolunye kuMasingana ngowezi-2023:
- SA v England: Bavuma (109):
Udlale ingcwenga yekhilikithi eweza amaProteas ngelibanzi. Ezakhe bezijaha umqansa wesibalo sama-runs ama-343 ngemuva kokuthi amaNgisi ebeke ama-runs angama-342 ebhodini ku-Innings yawo yokuqala. UBavuma ugcina eqokwa njengomdlali ovelele amaProteas enqoba ngamawikhethi amahlanu.
Mhla lulunye kuNhlolanja ngowezi-2023:
- SA v England: Bavuma (35):
Kulo mdlalo uphume esabhalise ama-run angama-35 ebhodini. AmaProteas agcine eguqa ngama-run angama-49.
Mhla ziyishumi nesishiyagalombili kuNdasa ngowezi-2023:
- SA v West Indies: Bavuma (114):
Yize amaProteas eguqe ngama-runs angama-44 kulo mdlalo obuseBuffalo Park esifundazweni sase-Eastern Cape, edolobheni iGqeberha kodwa uBavuma uqhubekile nefomu yakhe enhle ethola ikhulu lama-run.
Mhla zingamashumi amathathu nanye kuNdasa ngowezi-2023:
- SA v Holland: Bavuma (90*):
IHolland ihluleke yancama ukukhipha uBavuma. Ugcine engakhishwa enama-run angama-90. Ubambe elikhulu iqhaza amaProteas ephumelela ngamawikhethi ayisishiyagalombili.
Mhla zimbili kuMbasa ngowezi-2023:
- SA v Holland: Bavuma (6):
Kulo nyaka yiwona kuphela umdlalo asashaye kuwona encane. Noma kunjalo kodwa amaProteas agcine enqoba ngama-runs ali-146 kulo mdlalo obuseWanderers Stadium esifundazweni saseGoli.
