Kusize amaphenathi iMorocco idlulela phambili
IMorocco iqhubekile nokumangaza umhlaba kumqhudelwano weNdebe YoMhlaba, njengoba igezise ijezi iSpain koweLast 16.
Ngaphambi kokudlulela koweLast 16, eqoqweni iMorocco ihlule iBelgium enabadlali beqophelo eliphuzulu, yahlula iCanada, yadlala ngokulingana neCraotia. Ikwenza lokhu nje yayikade ingabhekiwe ukuthi ingadlulela kweyomkhumulajezi.
IMorocco ihlule ompetha boMhlaba bangowezi-2010 ngamathathu eqandeni sekukhahlelwa amaphenathi. Ngesikhathi sekuphele imizuzu engama-90, iMorocco ivele yatshengisa ukuthi isifuna kuyokhahlelwa amaphenathi, njengoba ibivala zonke izingqondo zeSpain ijike imoshe nesikhathi.
La mazwe bekungekhona okokuqala etholana kweyoMhlaba, atholana ngonyaka wezi-2018 kweyabe iseRussia nakhona adlala ngokulingana ngamagoli amabili umdlalo awuyanga kumaphenathi njengoba babedlala kowamaqoqo.
IMorocco kwiLast 8 izobhekana nezwe elizonqoba phakathi kwePortugal neSwitzerland. Amanye amaqembu asedlulele phambili i-England ezodlala neFrance, iNetherlands ezobhekana ne-Argentina kube iBrazil yona ezobhekana neCroatia