Izingane zazithola ukufundiseka emidlalweni yakudala
Kuqhubeka kushicilelo olwedlule:
Umdlalo kakholo. Lo mdlalo udlalelwa phandle. Kuyaye kuthi lapho izingane zibona ukholo ezulazula zihlabelele zithi:
“Kholo kholo kaNkovly’ ekhaya
Uphetheni ngomlomo?”
“Ngipheth’ amasi”
“Uwasa kwabani na?”
“Ngiwasa kwaZancengele-
Ancengele kancinyane
Athi gqi gqi gqi
Eme ngeguma
Lakwamnewabo
Athi umnewabo
“Ufunani laph’ endlini?”
Athi, “Ngifuna izajeje.”
“Ngezani zona?”
“Ngezabayeni.”
“Bafike nini?”
“Bafik’ izolo,”
“Wabahlabisani?”
“Ngabahlabisa ucilo-
Ucilo bamalile,
Baqonde imvubu
Yona nyamankulu-
Badle baphelele
Nontembuzane – Ntembuzane, ntembuzane – vosho!
Ntembuzane, ntembuzane-vosho!”
Umshishilizo
Kuthathwa izingewecwana zikathayela zithi ukubuyiswa kancane ngaphambili nangemuva. Ucwecwe lolu kumele lulingane ukuba umuntu angahlala kulo. Lolu cwecwe lukathayelake lubekwa endaweni eqethukile. Kuhamba kuhambe buze bulale bushelele utshani kuleyo ndawo bese kushishilizwake.
Nokho uthayela uyingozi uma uthuke umsika umuntu, kakhulukazi kanti ubusugwalile.
Okunye ukushishiliza kwenziwa ngesithende lapho linile. Kukhona abakwazi ukushishiliza indawo ende bengawanga futhi bengamanga.
Uncikidane
Lo mdlalo ungadlalwa ngabafana bodwa noma amantombazana odwa, noma-ke kuxutshwanwe. Udlalelwa endlint imvamisa lapho sekuhlwile. Kuhlalwa kusondelwane kube yisiqhoqho nje. Bese kuqala oyedwa abeke isandla ethangeni lomunye, kulandele omunye abeke esakhe kulesi esesiphansi, zelekane njalo-ke izandla mhlawumbe zize zibe yishumi noma kweve.
Lapho sezibekwe zonke-ke izandla ziqokothisiwe okomuntu obutha into ethile ngamachopho eminwe, wonke umuntu athi-ke: “Ncikidane, ncikidane, wo yosu, yosu, yosu.”
“Noma futhi kuthiwe:
“Ncinza ncinzane, ncinza ncinzane; sithathe sithi shwaphuluzi.”
Ngesikhathi kuthiwa yosu, yosu, yosu noma shwaphuluzi, kuyanewetshwana. Yilowo uncweba isandla esingaphansi kwesakhe kantinaye siyanave siyamuncweba esingaphezulu.
Ingqathu
Kwelukwa intambo ngotshani noma ngamakhasi ommbila. Kuvame ukuba intambo le ibe ngumvongqolozi.
Ibanjwa ngoyedwa kwelinye ichopho nomunye ngakwelinye.
Abazoyeqa-ke baba lujeje, balandelane ithi njalo lapho ishaya phansi ingqathu kungene oyedwa eqe aphumele nganxanye baze baphele kuqalwe futhi.
Mhlawumbe vumbe manje umuntu emunye eqe kabili noma kathathu aphume, noma eqe maqede kube khona umkhutshana awenza masinyane njengokuthinta iqakala, avuke masinyane kuseyisikhathi ithi ishaya phansi ebe eqa. Oshayo uyaphuma kube nguyena obamba ingqathu njalo njalo.
Unongekleni
Lona ngumdlalo wamantombazane wokwakha izingane. Odoli laba asebenziwa nasebephathwa yizingane manje bathatha isikhundla sikanongekleni.
Abanye onongekleni bayahlekisa nje ngoba baba nemikhono emide eyekezelayo eshumpukayo nokushumpuka.