Imibhikisho ithe chithi saka kukhalazwa ngokwenyuka kwezinto
Amakhulu abantu baseTunisia babhikishe enhlokodolobha bephikisana nobubha, amanani entengo aphezulu kanye nokushoda kokunye ukudla, nokukhuphule ingcindezi kuhulumeni kaMengameli uKais Saied, njengoba izwe libhekene nenkinga yezomnotho nepolitiki.
ITunisia idonsa kanzima ukuvuselela izimali zayo zomphakathi njengoba ukungeneliseki kukhula ngenxa yokwehla kwamandla emali okugijima cishe kuma-9% kanye nokushoda kokudla okuningi ezitolo ngenxa yokuthi izwe alikwazi ukukhokhela ezinye izinto ezivela kwamanye amazwe.
Lelizwe eliseNyakatho ne-Afrika liphinde futhi liphakathi kwesibhicongo sezepolitiki kusukela uSaied athatha izintambo zokuphatha ngonyaka odlule wahlakaza iphalamende ngalokhu abaphikisi bakhe abakubiza ngokuketula umbuso. Esifundeni esimpofu saseDouar Hicher enhlokodolobha, abanye ababhikishi baphakamise izinkwa emoyeni. Abanye babecula, “Uphi uKais Saied?”.
Intsha ethukuthele yashisa amathayi. Endaweni yaseMornag izinsizwa zivale imigwaqo zibhikishela ukuzibulala kwebhungu umndeni walo othi lizilengisile ngemuva kokuba amaphoyisa kamasipala elihlukumezile ashaqa umshini wokukala ngemuva kokuthi lidayise izithelo emgwaqweni ngaphandle kwemvume.
Amaphoyisa ophiko lwezibhelu aqhumise isisi esikhalisa unyembezi ukuhlakaza ababhikishi eMornag. Ababhikishi baphakamise iziqubulo ngokumelene namaphoyisa bajikijela namatshe.
E-Douar Hicher, ababhikishi bahlabelele “Imisebenzi, inkululeko nesithunzi sezwe,” futhi “Asikwazi ukusekela ukukhuphuka kwamanani okuhlanya”, “Uphi ushukela?”.
Ukushoda kokudla kuyanda eTunisia njengoba kunamashalofu angenalutho ezitolo ezinkulu nasezindaweni zokubhaka, okwengeza ukunganeliseki okudumile ngamanani aphezulu abantu abaningi baseTunisia abachitha amahora befuna ushukela, ubisi, ibhotela, uwoyela wokupheka nelayisi. Amavidiyo ezinkundleni zokuxhumana avele ngeSonto inqwaba yamakhasimende ejaha ukuthola ikhilogremu kashukela emakethe.
ITunisia, ebhekene nenkinga enkulu yezimali, ifuna ukuthola imali ebolekiwe ye-International Monetary Fund ukuze yonge izimali zomphakathi ekuweni.
