Now Reading
Ekugcineni isigomagoma somzabalazo sizophumula enhlabathini esayilwela
Dark Light

Ekugcineni isigomagoma somzabalazo sizophumula enhlabathini esayilwela

Anathi Mtaka

Okusele kwizinsalela zomholi wenkululeko waseCongo uPatrice Lumumba (osesithombeni) kubuyiselwe eDemocratic Republic of Congo (DRC). Izinyo legolide lathathwa iphoyisa laseBelgium. Amathambo  kaLumumba afike eDemocratic Republic of the Congo ngoLwesithathu, eminyakeni engaphezu kwamashumi ayisithupha ngemuva kokubulawa kwakhe. Amathambo azozungeziswa izweni lonke ngaphambi kokuba angcwatshwe enhlokodolobha, iKinshasa.

ULumumba wayenguNdunankulu wokuqala okhethwe ngokwentando yeningi eDemocratic Republic of Congo. Wethusa amazwe aseNtshonalanga ngokuvukela eMoscow ngesikhathi seMpi Yomshoshaphansi. Abalandeli bakaLumumba kanye nabanye osomlando basola iCIA ngokuthi iyalele ukuthi abulawe. Isidumbu sakhe asizange sitholakale. 

Isikhulu saseBelgium sinikeze amalungu omndeni waso ibhokisi eliluhlaza elinezinyo likaLumumba  e-Egmont Palace enkabeni yeBrussels ngoMsombuluko. “Akujwayelekile ukuthi abantu baseBelgium babambe izinsalela zomunye wabasunguli besizwe saseCongo iminyaka engamashumi ayisithupha,” kusho uNdunankulu waseBelgium u-Alexander De Croo enkulumweni yakhe. UDe Croo uthe ukubusa kwamakoloni eBelgium kuyikhasi elimnyama emlandweni waseBelgium, enanela amazwi eNkosi yaseBelgium uPhilippe ngesikhathi evakashele eDRC ekuqaleni kukaNhlangulana, wengeza ngokuthi abantu base-Afrika basabhekana nokucwaswa ngokwebala eBelgium nanamuhla.

Iqhawe lesizwe 

UNdunankulu waseDRC uJean-Michel Sama Lukonde ubize uLumumba ngeqhawe lesizwe wathi ukufa kwakhe nokucindezelwa kwabalandeli bakhe akulimazanga imindeni yabagilwa kuphela kodwa nezwe lonke.

See Also

Indodakazi kaLumumba, uJuliana, okwathi ngowezi-2020 yathumela incwadi eNkosini yaseBelgium icela ukuthi kubuyiselwe isidumbu sikayise, uthe kusekuningi okungaziwa mayelana nezikhathi zokugcina zokuphila kukayise. “Esikwaziyo wukuthi ulahlwe yicala futhi awukwazi ukuzivikela,” esho enkulumeni yakhe.

Uphenyo lwePhalamende laseBelgian ngokubulawa kwakhe lwaphetha ngowezi-2002 ukuthi iBelgium “yayinomthwalo wemfanelo” ngokufa kukaLumumba. Izinyo leli kubikwa lithethwe emzimbeni kaLumumba iphoyisa laseBelgium, uGerard Soete, othi wancibilikisa ingxenye enkulu yaLumumba nge-esidi, washisa okwasala.

Scroll To Top