Asabhekwe yisambane awaseKZN kuNedbank Cup
Ahlalelwe umqansa wokuqeda ishobolo leminyaka engama-51 ehlulwa yisicoco seNedbank Cup amaqembu aKwaZulu-Natal.
Kusukela wasungulwa lo mqhudelwano ngowe-1971 alikho nelilodwa iqembu laseKZN eselake ladla ubhedu kuNedbank Cup. Isikhathi esiningi amaqembu akulesi sifundazwe ahlale ehluleka wukubhakuzisa inethi ngemizuzu yokugcina.
Kule sizini izomelwa yiLamontville Golden Arrows, AmaZulu FC, iRoyal AM, iMaritzburg United, iRichards Bay FC, Uthongathi FC neSummerfield Dynamos egijima ku-ABC Motsepe League. Wonke amathemba abathandi bebhola kulesi sifundazwe azobe ehlezi kula maqembu ekutheni aqede lesi sikhwakhwalala seminyaka. INedbank Cup ihamba nesamba sezigidi eziyisikhombisa samarandi kanti inebhonasi lapho ompetha bathola ingqayizivele yokuyobamba iqhaza kuCaf Confederation Cup nezinkunzi zamaqembu ezwenikazi i-Afrika. ITshakhuma yaseVenda, eLimpopo iyona evikela isicoco. Ishaye iChippa United kowamanqamu.
IRichards Bay yilona iqembu laseKZN elihambe ibanga elide ngonyaka odlule. Ifinyelele kumaQuarterfinal. Imangaze inqwaba ikhipha iKaizer Chiefs kulo mqhudelwano ekubeni inganakiwe.
Eminyakeni eyedlule amaqembu aseke afinyelela kowamanqamu singabala AmaZulu, i-African Wanderers, iManning Rangers neMaritzburg United. Ngowe-1972, ngowe-1973 nangowe-1974, USuthu lwakhala ngaphansi kuMakhosi ne-Orlando Pirates iminyaka ilandelana. I-African Wanderers nayo igileke kowamanqamu ngowe-1982 ithelwa othulini yiChiefs.
USuthu kuliphindile lokho luqhuzuka kowamanqamu ngowe-1987. Liphazanyiswe yiChiefs. Ukhondolo olubi lokudliwa kowamanqamu aluphelelanga lapho kwazise ngowe-1990, USuthu luphinde lashelela kowamanqamu lishaywa yiJomo Cosmos.
Ngowezi-2004, uSteve Komphela wacishe waliqeda lolu khondolo olubi kodwa kwabheda kowamanqamu neRangers edliwa yiMoroka Swallows ngama-3/1. Muva nje iTeam of Choice iyona esanda kugileka kowamanqamu. Ngowezi-2018, yaqunjwa phansi yiFree State Stars kowamanqamu owawuseCape Town Stadium, eKapa.
Abalandeli bebhola eKZN kudala bayigcina injabulo. Sekuphele iminyaka eyishumi nantathu manje iqembu laseKZN lagcina ukunqoba isicoco somkhumulajezi.
Ngowezi-2009, Abafana Bes’thende balobola i-Ajax Cape Town ngayisi-6/0 e-Orlando Stadium benqoba isicoco seMTN8. Wonke amehlo azohlala emaqenjini afana neRoyal AM efike kwezwakala esigabeni esikhulu, AmaZulu angagayelwa mphako ngaphansi kobuholi bukaSandile Zungu neMaritzburg United.
IRoyal AM izobhekana neCape Town City eChatsworth Stadium mhla ziyishumi nambili kuNhlolanja ngehora lesithathu.
Leli qembu eliphethwe yisiqumama saseThekwini uShauwn Mkhize lisanda kuhlabana ngoMxolisi Macuphu, uShaune Mogaila noMarlon Heugh obebegijima kuTS Galaxy FC. Iphinde yathola noThabo Matlaba obedlala kuSwallows. IThwihli Thwahla yenza ezibukwayo ngesizini yayo yokuqala kuDStv Premiership.
AmaZulu azobhekana ne-Orlando Pirates, e-Orlando Stadium kusasa ngelesi-3 ntambama bese kuthi Abafana Bes’thende badudulane neTshakhuma namuhla ngelesi-6 ntambama.
ITeam of Choice izokwamukela iSuperSport United eHarry Gwala Stadium ngoLwesibili.
UThongathi luzovakashela iSummerfield Dynamos kowabakhaya ngomhla ziyishumi nanye kule nyanga ePrincess Magogo Stadium ngelesi-3 ntambama. Wonke la maqembu athwele amathemba eKZN osekuphele iminyaka engama-51 izabalaza kulo mqhudelwano.
Umqeqeshi wokugcina ukunqobela iKZN isicoco nguManqoba Mngqithi osecija iMamelodi Sundowns. Njengamanje inselelo ibhekene noBenni McCarthy, uJohn Maduka, u-Ernst Middendorp, uPapi Zothwane, uClinton Larsen, uPitso Dladla noLehlohonolo Seema.