Isidanga sevondwe kwabase-Afrika kwezemidlalo
Ukucwasa ngokwebala, nangobuzwe yinto lena ebukeka ingasoze yaphela emhlabeni wonke jikelele. Okwenza ngisho lokho ingoba lapha kwezemidlalo ukucwasana yinto elokhu iqhubeke njalo ekubeni ngabe kade yaphela, kwazise ezemidlalo izona ezihlanganisa izinhlanga eziningi ezehlukahlukene.
Ngeledlule nje lapha e-Afrika sivezelwe isithombe sokuthi asisoze sathandwa noma singenza kahle kanjani. NgoMsombuluko wamhla zili-17 kwephezulu kusihlwa bekumenyezelwa iqembu labadlali abali-11 elibizwa ngeFIFAPRO Men’s World X1, lapha kumenyezelwa abadlali abasuke benze kahle ngonyaka ophelile.
Kuleli qembu ligcine liqokwa kanje uGianluigi Donnarumma weParis Saint-Germain (PSG) uDavid Alaba weReal Madrid, uLeonardo Bonucci weJuventus, uRuben Dias noKevin De Bruyne beMachester City, uJorginho noNgolo Kante beChelsea FC. Phambili kufakwe uRobert Lewandowski weBayern Munich, uLionel Messi wePSG, uCristiano Ronaldo weManchester United no-Erling Haaland odlalela iBorrusia Dortmund.
Leli qembu lingishiye nombuzo wokuthi kanti kuqokwa kanjani, engasala kanjani umuntu ophume kwabathathu emklomelweni weFIFA Men’s Player lowo okunguMohamed Salah (osesithombeni) wase-Egypt. Lo mgadli ubenonyaka omuhle kakhulu, yini eyenziwe uRonaldo benoMessi ukuthi sebengaze befakwe kuleli qembu elenze kahle. Singekuphikise ukuthi labadlali baseqophelweni eliphezulu kodwa nyakenye abenzanga kahle neze.
Akugcinanga lapho kube esifanayo kunozinti waseSenegal ovimbela iChelsea FC u-Edouard Mendy, lo nozinti ufike wathola umklomelo weBest FIFA Men’s Goalkeeper kodwa wajike wangafakwa eqenjini lonyaka kunalokho kwafakwa uDonnarumma.
Umqeqeshi walapha eNingizimu Afrika uPitso “Jingles” Mosimane kungani evalelwe ngaphandle kubaqeqeshi abenze kahle ngonyaka wezi-2021. UMosimane oqeqesha iqembu lase-Egypt i-Al Ahly nyakenye unqobe iCaf Champions League okuwumqhudelwano osezingeni le-UEFA Champions League yalapha e-Afrika, iCaf Super Cup uyinqobe kabili wazoqokwa njengomqeqeshi ovelele kwiCaf.
Konke lokhu kubonakale njengento engathi shu nje, ukube bekungumqeqeshi oqhamuka e-England bekuzokhulunywa okunye.
Kwenzeka lokhu nje mhla ziyisi-9 kwephezulu kwaqala umqhudelwano walapha e-Afrika i-Africa Cup of Nations (AFCON) ebanjelwe eCameroon. Ukuqala kwalo mqhudelwano kwakumele kube ukuthi nemidlalo yaphesheya kwezilwandle iyama, abadlali bededelwe ngesinye beyomela amazwe abo kodwa lokho akwenzekanga.
Uma ungumuntu olandela unobhutshuzwayo uzokwazi ukuthi uma kudlala imiqhudelwano yamazwe ike ime imidlalo yamaqembu. Ngikhuluma nje ngonyaka odlule bekunomqhudelwano wase-Europe, obizwa nge-Euro nobusingethwe amazwe ali-11 nesekuwumlando ukuthi wagcina unqontshwe i-Italy. Ngalo mqhudelwano wonke umuntu emhlabeni ayebhekene wona, kwazise amaqembu ayengadlali abadlali bekhululiwe ukuyomela amazwe abo. Ngawo unyaka wezi-2021 kube nomqhudelwano iCopa America nowagcina unqotshwe i-Argentina iholwa uLionel Messi, nakhona kwaba esifanayo ukuthi amaqembu ame ukudlala.
Kubuhlungu ke ngoba lokhu kucwasana akugcini nje emazweni angaphandle kodwa nasemazweni ethu imbala siyacwaseka. Buka nje lapha eNingizimu Afrika kwikhilikithi kusavela amahlazo okuthi aboHlanga abadlala kumaProteas bahlukumezeka kangakanani, uMark Boucher ungomunye walabo abasolakala ngokucwasa ngesikhathi esangumdlali. Kunethimba elalibizwa nge “Big Five” elalingabezwa aboHlanga kuProteas.
USomankomane uThabiso “The Rock” Mchunu uyobanga ibhande le-WBC elagcina ukuphathwa uDingaan Thobela nalinqoba ngowezi-2000. Kodwa uMnyango weZemidlalo awubenzanga ubulungiswa kuyena, ukube bekuyingane yondlebe zikhanya ilanga ekade iyomela elakuleli kwezokubhukuda ibizokwesekwa ngendlela eyisimanga. Ngesonto elizayo uma enganqoba uyobe esethandwa iwona wonke umuntu, okwamanje kucwebe iziziba nje ingoba owoHlanga. Okuhle kodwa Macingwane!!!!
