Kuminyene utshumo ngemidlalo esemqoka yamazwe neyomhlaba kulo nyaka
Ukusabalala kokhuvethe ngonyaka wezi-2020 kwenze kwahlehla imiqhudelwano eminingi eminxeni ehlukahlukene yezemidlalo, kwazise phela leli gciwane lifika lidlule nemiphefumulo eminingi lasabalala umhlaba wonke.
Imiqhudelwano eminingi igcine isihlehlela lo nyaka esikuwo wezi-2022, lokhu kuchaza ukuthi kulo nyaka ithe chithi saka imiqhudelwano ezosingathwa. Kule miqhudelwano akuyona nje emincane kodwa kubalwa neyezindebe zoMhlaba.
I-African Cup of Nations (AFCON)
Le ndumezulu yomqhudelwano omkhulu ezwenikazi i-Afrika iwona ovule unyaka, kuyimanje uyaqhubeka uqale mhla ziyisi-9 kuMasingana uyoze usongwe mhla ziyisi-6 kuNhlolanja. Ubanjelwe eCameroon, udlalwa ngamazwe angama-32.
I-One Day International (ODI) Women’s Cricket World Cup
Lo mqhudelwano bekumele ube ngonyaka odlule kodwa wahlehliselwa kulo nyaka. Uzobanjelwa eNew Zealand, udlalwa ngamazwe ayisi-8 lawo mazwe iNew Zealand, i-Australia, i-England, iNingizimu Afrika, i-India, iWest Indies, iPakistan neBangladesh. I-England iyona ezobe ivikela isicoco, izwe eseliwunqobe kaningi i-Australia amahlandla ayisithupha.
IRugby World Cup Sevens
INingizimu Afrika iyona ezosingatha lo mqhudelwano, uzoba izinsuku ezintathu uzoba mhla ziyisi-9 kuya zili-11 kuMandulo eCape Town. Lo mqhudelwano ugcine ukuba ngonyaka wezi-2018 eNew Zealand okuyiyo evikela isicoco. Elakuleli ithuba lalo lokuthi liwunqobe okokuqala lo mqhudelwano owaqala ukuba khona ngonyaka we-1993. Indawo enhle eligcine ukuqeda kuyona eyamanqamu ngowe-1997 eHong Kong lihulwa iFiji ngamaphuzu angama-24 kwangama-21.
ICommonwealth Games
Lo mqhudelwano omkhulu uba khona njalo emva kweminyaka emine, ungomkhulu kakhulu ngoba uxube iminxa eminingi yezemidlalo. Kulo nyaka uzobanjelwa eBirmingham, e-England, uzoqala mhla zingama-28 kuNtulikazi uze usongwe mhla ziyisi-8 kuNcwaba. Kulo mqhudelwano kukhona izinhlobo zemidlalo okubalwa khona iHockey, iBasketball, ezokusubatha, iJudo, iCricket, iCycling neminye eminingi.
IFifa World Cup
Lona ngumqhudelwano obhekwe kakhulu kulo nyaka wezi-2022. Okuzobe kubhekiwe ukuthi abadlali abakhulu ababili emhlabeni uLionel Messi wase-Argentina noCristiano “CR7” Ronaldo wasePortugal bazobe bewudlala okokugcina lo mqhudelwano njengoba iminyaka isihambile nje kubona. UMessi nezwe lakhe vele sebezibekisele indawo, iPortugal iyona esasenkingeni njengoba kusamele idlale imidlalo yokuhlunga nje. Uzobanjelwa eQatar kusukela mhla zingama-21 kuLwezi kuze kube mhla zili-18 kuZibandlela.
I-ICC World T20
Kwikhilikithi lo mqhudelwano iwona ozobe ubhekwe kakhulu kulo nyaka, uhlehliswe kakhulu ngenxa yokhuvethe. Kulo nyaka kulindeleke ukuthi ube khona kusukela mhla zili-16 kuMfumfu kuze kube umhla zili-13 kuLwezi, uzobanjelwa e-Australia. Kulindeleke ukuthi ushube kakhulu njengoba wonke amazwe amakhulu enza kahle muva nje.
iRugby Women’s World Cup
Nabesibhuda nabo ngeke basala ngaphandle njengoba bezoba nayo iNdebe YoMhlaba abazoyidlala kulo nyaka. Le Ndebe YoMhlaba izobanjelwa eNew Zealand kusukela mhla ziyi-8 kuMfumfu kuze kube umhla zili-12 kuLwezi.
Eminye imiqhudelwano emikhulu ekhona kulo nyaka iHockey Women’s World Cup ezobanjelwa eSpain ngokubambisana neNetherlands ngoNtulikazi, iWinter Paralympics ezoba seBeijing ngoNdasa, iWorld Volleyball Championship yabesilisa ezoba seRussia ngoNcwaba kuze kube uMandulo.
Kuzophinde kube iWorld Volleyball Championship yabesifazane ezokuba seNetherlands kanye nasePoland ngoMandulo kuya kuMfumfu.