Avukwe yisifo sawo esidala amaProteas ebhaxabulwa yiSri Lanka
La mazwe aye emdlalweni wayizolo ebambene ngo 1-1. Iqembu lasekhaya linqobe umdlalo wokuqala ngama-run ayi-14 kwathi kowesibili amaProteas abuyisa izinduku evithiza iSri Lanka ngama-run angama-67.
Wonke amehlo abethe njo kulo mdlalo obunguwafawafa kuwona womabili amazwe.
Iqembu lasekhaya linqobe ithosi lase lithatha isinqumo sokuthi yilona elizobhetha kuqala.
Abashwibi bamaProteas benze umsebenzi oncomekayo ngendlela eyisimanga. Babavove inkani abadlali beSri Lanka ababhethayo. Ngemuva kwama-over angama-50, osokhaya bagcine behlanganise ama-run angama-203 kusawe amawikhethi ayisishiyangalolunye.
Ama-spinner eNingizimu Afrika yiwona enze izinto zenzeka. Kuma-over angama-50 ashwibe angama-40.
UKagiso Rabada, Wiaan Mulder no-Andile Phehlukwayo yibona abahlanganise ama-over ayishumi abjikijelwe ngabashwibi abathumela amabhola asheshayo.
URadaba ushwibe ayisishiyagambili kwathi uMulder noPhehlukwayo bathola i-over eyodwa umuntu ngamunye.
Amawikhethi elakuleli athathwe nguKeshav Maharaj ohlomule ngamathathu, uTabraiz Shamsi noGeorge Linde abathole amabili umdlali ngamunye, uMulder no-Aiden Markram abathathe iwikhethi eyodwa umuntu ngamunye.
UDhananjaya De Silva noCharith Asalanka yibona abadlale into ebonakalayo kubabhethi beSri Lanka.
U-Asalanka ushaye ama-run angama-47 emabholeni angama-71 kwathi uDe Silva waqoqa angama-31 emabholeni angama-44.
Bobabili basize iSri Lanka yahlanganisa ama-run angama-203. Ngemuva komsebenzi omuhle owenziwe ngama-spinner amaProteas konke bese kulele kubabhethi ekutheni baweze elakuleli ngelibanzi.
AmaProteas awazange aqale kahle ku-Innings yawo. Abedinga ama-run angama-204 ukuze anqobe emabholeni angu-300 (ama-over angama-50).
Ngemuva kwama-over ayishumi bese kuwe amawikhethi ayisithupha ku-innings yamaProteas.
Elakuleli bese libhekene nomqansa kwazise wonke amawikhethi anginqike nge-PowerPlay yokuqala bekubabhethi abamqoka.
Kuphume uJannine Malan (18), Markram (2), Reeza Hendricks (1), Rassie Van Der Dussen (5), Henrich Klaasen (22) noMulder (2).
UMaheesh Theekshana uphendule amabhethi beNingizimu Afrika isilo sengubo.
Uwole amawikhethi amane. AmaProteas aphume wonke esenze amarun ayi-125 kuma-over angama-30.
Okwenzeke izolo yinto engaqali. AmaProteas avele anawo umkhuba omubi wokuhluleka wukumelana nengcindezi emidlalweni emqoka noma emikhulu.
Leli qembu selaziwa njengezehluleki. Isikhathi lihlale liya eNdebeni yoMhlaba lithwelwe ngeqoma kodwa uma sekufanele lishintshe amagiya kuvele kucishe imoto.
Nayizolo kuvuke leso sifo. Isikhala sikaBavuma olimale emdlalweni wokuqala sibonakele. Kowokuqala waphoqeleka ukuthi akhishwe ngemuva kokuthinteka.
UMaharaj nguyena ogcine ethathe isikhundla sokuhola iqembu. Njengamanje la mazwe asezotholana phezulu emidlalweni emithathu yeT20.
AmaProteas alungiselela iNdebe yoMhlaba ese-Oman nase-United Arab Emirates ngoMfumfu. Umdlalo wokuqala weT20 ungoLwesihlanu ngo-4.30 ntambama ePremadasa bese kuthi owesibili udlalelwe enkundleni efanayo ngeSonto ngesikhathi esifanayo. Umdlalo wokugcina uzoba ngoLwesithathu ngo-4.30 ntambama.
