INkosazane uNomoya noMhlabuhlangene balile noZulu

Ukwebuza kweSILO akubanga umuga kuZulu kuphela kepha kukhalwe kuwo wonke amagumbi amane omhlaba. Ohulumeni naMakhosi ezwekazi i-Afrika nawo abelila.  Umunyu ebusweni beNkosazane uCharlene waseMonaco obekwaNongoma izolo budwebe isithombe esiphelele. Ngaphandle ngokuba nobudlelwano iPrincess Charlene of Monaco Foundation, iSILO sayetha leNkosazane ngelikaNomoya.

Kanjalo nenhlangano yomhlaba uhlangene i-United Nations (UN) yedlulise isililo. UNobhala Jikelele we-UN, uMnu u-Antonio Guterres ukhumbule OMdala njengomholi obemnene.  Ubudlelwane beSILO nezinhlaka ezifana ne-African Union (AU) kanye ne-UN buneminyaka. Abe-AU ngaphansi kweNEPAD bamema iSILO ukuba siyokwethula inkulumo emcimbini wokwethulwa  kweNEPAD Rural Development Forum eBenin. Lolu hlaka lwabukela kulelo olwethulwa yiSILO – i-Ingonyama Rural Development Forum ngawo lowo nyaka.  Abe-UN batusa izinhlelo ezilandela isiko ezethulwa yiSILO ngokukwazi ukusabalalisa imikhankaso elwa nengculaza. 

AmaMelikana kawasalanga ngaphandle njengoba nawo ebabazile. Ngomlomo weDepartment of State, egameni labantu bakuleliya lizwe bathe iSILO besiyisishabasheki semikhankaso ethinta izifo ingculaza nokhuvethe  ngaphansi kohlelo iPresident’s Emergency Plan for AIDS Relief (PEPFAR).