Kuningi okubhekiwe kuNedbank
Imidlalo yeLast 32 yeNedbank Cup, eqale kuthangi ngoLwesithathu, ilindeleke ukuthi iqhubeke nokuhlabahlosa ngezigigaba ezizoshiya abalandeli bengawuvali umlomo. Sekuvamisile ukuthi lo mqhudelwano, ofaniswa neFA Cup e-England, ushiye amaphanta edemelayisa kwazise izimfivilithi zawo ziwashiswa amajezi ekuseni. Amaqembu anjengeBaroka FC, iMaritzburg City (eyagila izimanga lo mqhudelwano usabizwa ngeBob Save Super Bowl), i-Alspark Tawana, iFC Cape Town, i-University of Pretoria neMaluti FET College, awakhohlakali kalula ezingqondweni zabaningi. Labo nkunzana ababedlala kuSecond Division nakuGladAfrica Championship babhuquzisa amaqembu anjengeKaizer Chiefs, i-Orlando Pirates, iMoroka Swallows nePlatinum Stars kwashunqa uthuli, abantu basala bebambe ongezansi. Ikhiqize abadlali abanohlonze Kuleyo migilingwane, kwakhiqizeka nabadlali abaphenduka ondabamlonyeni njengoba bagcina sebedlala emaqenjini amakhulu nakuBafana Bafana.
Ngamanye amazwi, abadlali basebenzisa lo mqhudelwano njengesitebhisi sokwenyukela ezingeni eliphezulu ngokukhula kwebhola labo. Phakathi kwabo kukhona uMbulelo Mabizela, uJimmy Tau no-Andile “Sguda” Cele, abasuka kuMaritzburg baya kuPirates, uKurt Leintjies owathathwa kuFC Fortune yiMamelodi Sundowns no- Andile Jali owabonwa kumaTuks wayoba injini kuPirates, ukubala abambalwa. Inselelo yabakuleli Abaqeqeshi baseNingizimu Afrika bahlalelwe umsebenzi wokuqeda ukucanasa kozakwabo bokufika kuleli ngalo mqhudelwano ongena onyakeni we-12.
Selokhu kwangena leli bhange njengabaxhasi ngowezi-2008, abaqeqeshi bokufika sebegiye bathela ngothuli izikhawu eziyisikhombisa abakuleli esigcawini lapho kusuke kumukeliswa khona izindondo zabanqobile. Abakuleli bona bahlanu kuphela asebekwazi ukuholela amaqembu abo empumelelweni. Kwaqala uTrott Moloto ngesikhathi eyibambamqeqeshi kuSundowns eyadla iMpumalanga Black Aces seliyoshona ngegoli elilodwa eqandeni eJohannesburg Stadium. Emuva kwakhe kuvele uJulio Ceasar Leal waseBrazil, wadla umhlanganiso neSwallows kudlulwa kumaTuks ngegoli elilodwa elingaphendulwanga. URoger de Sa uqhamukile ngesizini elandelayo neBidvest Wits becoboshisa AmaZulu FC ngamathathu eqandeni eFNB Stadium. Ngesizini yezi-2010/11 uRuud Krol waseHolland unqobise iPirates idlula kuBlack Leopards ngamathathu kwelilodwa kwase kuthi uGavin Hunt walinganisa isibalo sabakuleli ngokunqobisa iSuperSport United kuSundowns ngamagoli amabili eqandeni ngesizini eyalandela. Amasizini ezi-2012/13 nawezi-2013/14 kwabusa abokufika njengoba uStuart Baxter waseScotland noVladmir “VV” Vermezovic waseSerbia kwakungathi bayabukisa.
UBaxter weChiefs washaya iSuperSport ngegoli elilodwa eqandeni kwathi uVV ekuPirates wadlula ngehubo lamagoli amathathu kwelilodwa kuWits. UPitso Mosimane usibuyisile kancane isithunzi sabakuleli ngesikhathi esiza iSundowns idlula ngawasemlotheni ku- Ajax ngama-4/3 ngesizini yawezi-2014/15. Kodwa ubuyile uBaxter esehamba neSupersport wadla iPirates ngamathathu kwelilodwa waliphinda iBhakabhaka elibhudluza ngamagoli amane kwelilodwa ngesizini yowezi-2016/17. Kuse njalo kuqhamuke umfo waseBelgium uLuc Eymael wayiphakamisa neFree State Stars bedlula ngelilodwa eqandeni kuMaritzburg United. NguDan “Dans” Malesela ogcine ukumela abakuleli ehola kamnandi iTS Galaxy idla iChiefs ngegoli elilodwa eqandeni ngesizini edlule. Ukudlala kuCaf Ali-16 amaqembu ePremiership, abe yisi-8 aweGladAfrica Championship bese kuba isibalo esifanayo kwadlala kuma amesha ancintisana kulo mqhudelwano. Onqobayo akagoduki nesheke lezi-R7 million kuphela kepha uhlalelwa umsebenzi wokumela izwe kuCAF Confederation Cup.
Obekungaziwa ngamavukana azobonakala kulo nyaka IPassion FC ezodlala neReal Kings idabuka esifundazweni iMpumalanga kanti idlala ku-ABC Motsepe League. Bazifanisa nompetha base-England, iManchester City, njengoba begqoka ijezi elinemibala eluhlaza. Amavaravara FC azoshukana neSuper Eagles eMdantsane kusasa, angawaseKomani eQueenstown. Bobabili badlala kuMotsepe League. IVaal University of Technology idlala kuSAB League kanti izobe ifuna ukumangaza iGolden Arrows njengoba idlala ekhaya eSoweto. INorth West University izovakashela iLeopards eVenda. Lesi sikole esidlala kuMotsepe sikhiqize insephe yaseswini yePirates uXola “Ten Ten” Mlambo. IZizwe United ibhekene neHappy Wanderers yaseMargate ogwini oluseningizimu yeKwaZulu-Natal engaqali ukudlala kulo mqhudelwano. IZizwe zidabuka eNyanga, eKapa.
