Ukukhonza amahlaya sekumenza amamatheke
ALOKHU eqhubekile nokuqaqeka amaketanga kusomahlaya uCabangile Gumede ongomunye owakhe ithimba labalingisi bezinga eliphezulu elizobonakala emdlalweni iMeet the Khambules – Omzilankatha ozoboniswa kuDStv, kuChannel 157.
Kulo mdlalo wamahlaya ovutshelwe yiSite et Sons Media Production Company okuyinkampani yaKwaZulu-Natal, uCabangile waseSiyanda, KwaMashu, eThekwini, uzolingisa indawo kaGwineth ongumakhelwano othanda ukukhuluma, wezinjinga zakwaKhambule.
Lo mdlalo obophele iningi lo somahlaya baKwaZulu-Natal uzoqala ukuboniswa kulesi sitishi kusukela mhla zili-19 kuNhlaba. Uzongena esikhundleni sothi Judge Thenjiwe Khambule nawo ovutshelwa yiSite et Sons Media Production ephethwe ngabesifazane bodwa.
UCabangile uthola ithuba lokulingisa kulo mdlalo nje, usanda kunyelwe yinyoni esandleni eba ngomunye wabalingisi bomdlalo wethelevishini omusha, iMbewu oqale ukuboniswa ngoMsombuluko, kwa-Etv.
Kulolu chungechunge oluboniswa ligamenxe ihora lesi-9 ebusuku, kusukela ngoMsombuluko kuya kuLwesihlanu, ulingisa indawo yokuba yisangoma sikaNgcolosi okungenye yezinsizwa zakwaBhengu.
Abaningi uCabangile bamazi ngamahlaya awaqopha bese ewafaka ezinkundleni zokuxhumana. Isiqephu samahlaya azakhele udomu ngaso ngesithi Judge Thenjiwe Court Number 10 lapho elingisa nesilomo uThenjiwe Moseley.
Echaza ngokujoyina kwakhe iMeet the Khambules, uthi ngoMfumfu wanyakenye wahambela inhlolokhono eyayiseThe Playhouse Company naseBat Centre, eThekwini.
“Ikhono enginalo amajaji lawashiya ebambe ongenzansi. NgoNhlolanja ngibe sengiqala ukushutha nethimba leMeet the Khambules. Nakuba ikhona imidlalo engisebenze kuyo eboniswe kuthelevishini kodwa lona ngowokuqala wamahlaya. Kuyangijabulisa lokhu ngoba amahlaya yinto egijima emzimbeni wami. Nginethemba lokuthi ngizofunda okuningi. Ngiyambonga Ongenhla ngokugcina ewavulile amasango empumelelo yami. Besekuphele isikhathi eside ngithwele kanzima,” kubeka uCabangile obelokhu embonge njalo uThenjiwe Moseley.
Mayelana nolwazi lokulingisa, lo somahlaya uthi usizwe wukusebenza eminyakeni edlule ku-UMabatha okungumdlalo weshashalazi oqondiswe umakadebona uWelcome Msomi.
Ngenxa yalo mdlalo uthole ithuba lokuhambele amazwe anjenge-United States of America (USA), iCanada, i-England, iSwaziland, iMozambique namanye amaningi.
Azinye izinkakha ancele kuzo ulwazi nguJerry Poe nomufi u-Alfred Nokwe wakwaMashu.
Engqayini, uCabangile usebenze kwethi Ibala, iVusikhaya naku-Umgcagco Wezinyembezi.
UZamo Missie weSite et Sons Media Production Company wazise iBAYEDE ukuthi uma kuphela uSeason 1 weMeet the Khambules kuzoshuthwa eyesibili neyesithathu kuhlanganisa noweJudge Thenjiwe Khambule. Uqhube wathi okuhle ngala maSeason ukuthi azoshuthelwa eThekwini.
“Iningi labalingisi abadlala kuMeet the Khambules nakuJudge Thenjiwe Khambule ngabaKwaZulu-Natal. Kasisasiboni isidingo sokuya eGoli ekubeni abantu esisebenza nabo kungabakulesi sifundazwe. Kwayona iSeason yokuqala yeMeet the Khambules besifuna ukuyishuthela KwaZulu-Natal kodwa sagcina sesiyenzela eGoli ngenxa yezinkinga ezithile. Empeleni inkampani yethu isezinhlelweni zokuqeda umkhuba wukufudukela kwezinye izifundazwe kwabalingisi baKwaZulu-Natal,” kubeka uZamo.
IMeet the Khambules ikhuluma ngomndeni oyizigwili wakwaKhambule onesithabathaba somuzi KwaMashu. UNkk noMnu uKhambule banendodakazi, eyisimomondiya eshaya ngoxhaxha lweziqu zasenyuvesi. Iphinde ibeyisikhulu esiphezulu enkampanini yomndeni iKhambule General Trading (KGT). Phezu kwalokhu, unina ukholelwa ekutheni ukuze iphumelele ngokugcwele kumele ishade.
Abanye abalingisi balo mdlalo uThenjiwe Moseley, uMondli Mzizi, uSithembiso Khumalo, uTumi StopNonsons, uMduduzi Dlamini waseSwazini nabanye.
- mkhizes@ingabadimedia.com
