Ngabe zizobuya izinduku zangowezi-2011 kuMakhosi?
Amathemba eKaizer Chiefs kusasa eMoses Mabhida Stadium alele kuSiphiwe Tshabalala nonozinti uKhune
UMA kukhulunywa ngomdlalo owagqamisa iBaroka FC kuvuka iminjunju kubalandeli nakubadlali beKaizer Chiefs ngoba ilapho yaguqiswa khona ileli qembu lasePolokwane ngowezi-2011 ngaleso sikhathi elalidlala kuVodacom League eseyaziwa nge-ABC Motsepe League.
IBaroka yayicijwa uSello Chokoe owayegqoka igilavu esandleni kuthiwa usebenzisa umuthi. IBaroka yazifaka emlandweni iguqisa iChiefs ngamagoli amabili kwelilodwa emqhudelwaneni weNedbank Cup. Kusasa kuzoba izinkani zababili la maqembu etholana phezulu eMoses Mabhida ngelesi-6 ntambama emdlalweni we-Absa Premiership.
IChiefs emdlalweni emithathu esike yabhekana kuyo neBaroka ayikaze iyehlule. Emdlalweni eyedlule edlalwe ileli qembu elicijwa uSteve “Mphathi” Komphela lenza kahle kanti umdlali olisizayo u-Itumeleng Khune ongafune lutho ezintini.
Womabili la maqembu ayiqale kahle isizini njengoba iBaroka ilele endaweni yesibili ngamaphuzu ali-11 emuva kwemidlalo eyisithupha, kanti iChiefs ilele isine ngamaphuzu ayisi-9.
Kubukeka umlando ungaziphinda ukuthi iChiefs ingayiguqisi iBaroka kusasa njengoba leli qembu lingakaze liguqe kule sizini. Ukucishe idliwe izembe ngesizini ephelile kuyivule amehlo njengoba ingagayelwa mphako kulezi zinsuku.
Abadlali okuyibo abayiphela endlebeni kuleli qembu sibala uSipho Moeti, uGift Motupa ohamba phambili ngokuhlohla amagoli kube uSiphelele “Starch” Ntshangase osuka kuBlack Leopards ofike wangena khaxa esitayeleni saleli qembu.
IChiefs isahlulwe kanye ihlulwa iSupersport United ngamagoli amabili kwelilodwa. Kanti amathemba aleli qembu akuGustavo Paez, uSiphiwe Tshabalala noKhune okuyibo abenza kahle kulezi zinsuku.
Okubhekeke kakhulu kulo mdlalo ukubona uDoctor “16 V” Khumalo ezobhekana neChiefs okokuqala ngqa. Lo mqeqeshi uchithe cishe impilo yakhe yonke kuleli qembu njengoba ehlale iminyaka engama-32 engumdlali futhi engumqeqeshi. UKhumalo uhambe ekuqaleni kwale sizini wajoyina iBaroka kanti okuvelayo ukuthi nguye oze noguquko kuleli qembu njengoba ligila izimanga nje.
Lo mqeqeshi odlale imdlalo engama-397 kuChiefs maphakathi nesonto utshele abezindaba ukuthi ufuna ukuthi ezakhe ziwanqumele ogodweni Amakhosi.
“Ukuyeka kwami kuChiefs bengazi ukuthi ngizothola omunye umsebenzi lokho kusho ukuthi bengazi ukuthi ekugcineni ngizobhekana nayo. Ngikulungele ukubhekana nayo anginagqubu nayo kodwa ngifuna ukuthi siyinqumele ogodweni,” kusho uKhumalo
Uqhube wathi ngeke kube lula ukugingqa iChiefs eMabhida ngoba ikhaya labo lesibili futhi bathandwa kakhulu uma bekule nkundla. “Kuzoba umqansa ukuhlula iChiefs eMabhida ngoba abalandeli baseThekwini ngathi basuke bethululwe ngamabhasi ukuzobuka lezi zinkunzi zaseSoweto,” kubeka uKhumalo.
Ngesizini edlule la maqembu adlale imidlalo yomibili ngokulingana, kowokuqala zabambana ngeqanda nhlangothi zombili, kowesibili zabambana ngamagoli amabili aweChiefs ashawa u-Eric Matoho noBernard Parker kwathi aweBaroka ashawa uVictor Letsoalo noMxolisi Kunene.
