UMokwena ukhuza uZungu ngokuzethwesa umthwalo kuSundowns
Kukhuzwa isibabuli somdlali weMamelodi Sundowns uBongani “Ben10” Zungu ngokuzifakela ingcindezi engenasidingo.
Lesi siluleko siqhamuke kuRhulani Mokwena ocija iqembu ngesikhathi exoxa nabezindaba ngoLwesibili ebusuku.
ISundowns ibambane ngelilodwa neSuperSport United emdlalweni weDStv Premiership obuseLoftus Versfeld Stadium, ePitoli.
Igoli leBrazilians libaselwe enethini nguTeboho Mokoena kwathi elaMatsatsantsa A Pitori labhanjiswa ezintanjeni nguBradley Grobler.
“UZungu usewutholile umgqigqo wakhe. Ufike kithina eqhamuka kwenye indawo. Kuthe kusenjalo wahlushwa wukulimala. Lokho kuholele ekutheni ukuzethemba kwakhe kwehle. Uthe uma efika eNingizimu Afrika wabhekana nenselelo yokubuyisa udumo lwakhe. Asikhulumeni iqiniso ngesikhathi eshiya kuSundowns wayeyisihlabani. Ufike phesheya wadlala nabadlali abafana noMarco Verrati. Manje usebhekene nejoka lokuzakhela kabusha igama ngemuva kokungenzi kahle phesheya,” kubeka uMokwena.
UZungu ujoyine iSundowns ekuqaleni kwesizini edlule esuka ku-Aimens yaseFrance.
“Ngichithe isikhathi eside noBongz. Ngimazi kusukela afika ezojoyina iSundowns okokuqala. Esadlala ku-Aimens ngaya eFrance ngafika ngahlala naye izinsuku eziyishumi. Nguyena owakhokhela izindleko zami ngesikhathi ngiseFrance. Ngathola ithuba lokumbona esejimini ngaphinde ngahlangana nabaqeqeshi bakhe. Ngaphinde ngathola nethuba lokuhlala esigcawini sabo lapho behlaziya khona izitha. Manje ubuyele kuSundowns wafika wangazithola ukuthi usekuphi ngoba wahamba eyisihlabani. Uqale wazifuna futhi lokho kuthatha isikhathi,” kubeka uMokwena.
UZungu usekhombisa izimpawu zokubuyela ezingeni aziwa ngalo njengamanje okufakazelwa wukuzitamuzela kwakhe ngesikimu.
“Njengamanje useyamukele inselelo abhekene nayo njengomdlali. Manje usengumholi eqenjini. Akusafani nangesikhathi ehamba. Ngaleso sikhathi wayengaphansi kobuholi bukaTeko Modise noHlompo Kekana. Manje sekuyisikhathi sakhe sokuhola. Yinto efanayo nakuMshishi (Themba Zwane). Naye kumele ahole iqembu. Nguyena ophethe ibhande. Akusafani nakuqala lapho ebeholwa kodwa nguyena osehola. Manje akusamele azicabangele yena kuphela. Kumele acabangele nozakwabo enkundleni nangaphandle kwenkundla. Okwamanje akakafiki ezingeni lakhe,” kuqhuba uMokwena.
UBen10 uphinde wagqama iSundowns ibambana neSuperSport kowomkhaya baseTshwane.
“Uma eseyijwayele inselelo yokuhola sizoqala sibone ifomu yakhe yangempela ngoba uzobe esengenile egiyeni. KuChippa United wenze iphutha ngemuva kwalokho wakhathazeka ngendlela eyisimanga. Ngihlale naye phansi ngamtshela ukuthi angakhathazeki. Ngimbuzile ukuthi kungani kumele ahlale nengcindezi yephutha? Abanye abantu bayawenza amaphutha bamukele baqhubeke nempilo. Ngimbuzile ukuthi kungani kumele azithwese ijoka emahlombe akhe? Muva nje bengibuka uLewis Hamilton (ongumshayeli wezimoto) ethi uma ezithwesa umthwalo (wokujaha irekhodi likaMichael Schumaker) ngeke enze kahle ngosuku lwemijaho. Uma eke wahlala ngenkululeko uzobuyela ezingeni lakhe. Udinga lokho njengemanje.” kuphetha uMokwena.
