Ingqungquthela ye-EU ngoxhaso oluthunyelwa e-Ukraine
Abaholi be-European Union (EU) bazohlangana namuhla lulunye kuNhlolanja wezi2024 eBrussels ukuze bazame ukufinyelela esivumelwaneni ngemali eyizigidigidi eziyizinkulungwane ezingama-$54, okuyiphakethe loxhaso eya e-Ukraine ezosiza ukugcina leliya lizwe lisebenza iminyaka emine ezayo. Ngaphandle koxhaso olwengeziwe, abahlaziyi bathi, i-Ukraine izobhekana nenkinga yezomnotho engase iphazamise kakhulu ikhono layo lokulwa ngempumelelo neRussia.
Izingxoxo owamanje bezimile ingekho evuma ukugoba uphondo, njengoba abaholi bale nhlangano babezama ukwenza isivumelwano noNdunankulu uViktor Orban waseHungary, ovimba ukuthunyelwa kwalolu xhaso. Kuyinto eyaziwayo ukuthi u-Orban ungumngani omkhulu kaMengameli uVladimir Putin waseRussia.
Abagxeki bathi u-Orban umane nje uzama ukwelula ukugcina amandla akhe nokusebenzisa ilungelo lezwe lakhe njengenzuzo yokukhulula izigidigidi zamayuro e-EU oxhaso olubanjiwe ngenxa yokuthi izwe lakhe laphula imithetho yalenhlangano.
Uma u-Orban evimba uxhaso olubhekiswe e-Ukraine, njengoba enza ngoZibandlela, abaholi be-EU bakubeke kwacaca ukuthi bakulungele ukwenza noma yini edingekayo ukuze basekele i-Ukraine futhi bazimisele ukusebenza ngale kwakhe – noma bamjezise.
Imininingwane: Usizo luzohlanganisa ingxenye yesine yesabelomali sase-Ukraine kulo nyaka, lukhokhela izinto ezifana namaholo othisha, impesheni nokunakekelwa kwezempilo.
