Ama-PROTEAS asethubeni lokufinyelela kowamanqamu eNdebe yoMhlaba okokuqala emlandweni wawo wekhilikithi
Kusasa ngo-10.30 ekuseni azodudulana ne-Australia emdlalweni owandulela amanqamu eNdebe yoMhlaba e-Eden Garden, eKolkata, kwelaseNdiya.
AmaProteas aqede imidlalo yamaqoqo endaweni yesibili kwathi ama-Aussies ayibamba kweyesithathu. Intatheli yelaboHlanga uZipho Singela isibhekela izinto ezinhlanu ezingabeka elakuleli ethubeni lokufinyelela kowamanqamu.
Kumqoka ukuwina ithosi:
Amazwe amabili anqobe kule nkundla yaseKolkata emidlalweni emibili eyedlule awine ithosi aqoka ukubhetha kuqala. Womabili agcine enqobile. Osekuhlalukile ngale nkundla wukuthi kunzima ukubhetha ngangcino. Okwesibili ngale nkundla wukuthi ivuna kakhulu abashwibi bohlobo lwe-spin ikakhulukazi ku-Innings yesibili. Ngakho amaProteas kumele athandazele ukuwina ithosi bese ebhetha kuqala. Okuhle wukuthi akakaze ashaywe ebhetha kuqala kulo mqhudelwano. Ashaye iSri Lanka, England, Australia, neNew Zealand Bangladesh ebhetha kuqala. Kuyo yonke le midlalo ashaye ama-run angaphezu kwama-300.
Imidlalo yakamuva eKolkata:
SA v India:
ElaseNdiya libhudluze amaProteas ngama-run angama-243 ngeledlule eKolkata. Ukaputeni welaseNdiya, uRohit Sharma uwine ithosi wabhetha kuqala. Ezakhe zibeke amarun angama-326 kusawe amawikhethi ayisithupha kuma-over angama-50. AmaProteas ahlulekile wukujaha lesi sibalo. Aphume wonke asahlanganise ama-run angama-83. URavenda Jadeja oshwiba uhlobo lwamabhola apinayo uhlomule ngamawikhethi amahlanu.
England v Pakistan:
AmaNgisi awine ithosi aqoka ukubhetha kuqala. Ahlanganise ama-run angama-337 sekuwe amawikhethi ayisishiyagalolunye kuma-over angama-50. Ku-Innings yesibili elasePakistan liphume lonke kuma-over angama-44 selenze ama-run angama-244. AmaNgisi anqobe ngama-run angama-94. U-Adel Rashid noMoen Ali abashwiba amabhola apinayo bathathe amawikhethi amabili umdlali ngamunye.
Kwabavulayo kukhona okumele ashaye u-50 noma u-100:
- Kuyo yonke imidlalo lapho oyedwa wabavulayo eshaye khona amarun ayi-100 noma angama-50, amaProteas ayinqobe yonke leyo midlalo. UQuinton De Kock useshaye amakhulu amane kulo mqhudelwano kwathi uReeza Hendricks washaya amarun angama-50 owodwa kade elakuleli lithela othulini amaNgisi. Ukaputeni uTemba Bavuma nguyena kuphela ongakaze athole amarun angama-50 kubadlali abayisikhombisa amabhethayo. URassie Van Der Dussen unamakhulu amabili nama-50 amabili bese kuthi u-Aiden Markram abe nekhulu elilodwa nama-50 amabili. UHeinrich Klaasen unekhulu nama-50 ababili bese kuthi uDavid Miller noMarco Jansen babe nama-50 umdlali ngamunye. Uma kwabavulayo kukhona oshaye amarun angama-50 noma ikhulu ababhetha phakathi nomdlali noma ezanzi benza kahle ngoba isisekelo sisuke siqinile phezulu.
Kumele sithole amawikhethi ngokushesha kuPowerPlay yokuqala:
AmaProteas asenze umsebenzi omuhle kakhulu kule Ndebe yoMhlaba yokuthatha amawikhethi amabili kuya phezulu kuPowerplay yokuqala. Iwikhethi kaDavid Warner ibalulekile. Uma eqale kahle ama-Aussies kuba nzima ukuwanqanda. Ngesikhathi la mazwe abhekene kweyamaqoqo, amaProteas athatha amawikhethi amathathu ku-powerplay yokuqala. Akhiphe uWarner (13), Marsh (7), noSmith (19). Lokhu kuwubulale kwakuqeda umgqigqo we-Australia.
La mazwe angase abophele kanje:
AmaProteas:
- Quinton De Kock
- Temba Bavuma
- Rassie Van der Dussen
- Aiden Markram
- Heinrich Klaasen
- David Miller
- Marco Jansen
- Keshav Maharaj
- Kagiso Rabada
- Gerald Coetzee
- Tabraiz Shamsi
Australia:
- David Warner
- Mitchell Marsh
- Steve Smith
- Glenn Maxwell
- Marnus Labuschagne
- Josh Inglis
- Marcus Stionis
- Pat Cummins
- Mitchell Starc
- Josh Hazlewood
- Adam Zampa