Kuhlukanise umndeni ukudayiswa koThongathi FC
Yize kusabalele izinkulumo zokuthi kunomdonsiswano phakathi kwezikhulu zoThongathi FC ngokudayiswa kweqembu kodwa elaboHlanga selungakuqinisekisa ukuthi akusekho okuzoshintsha. UThongathi luthengwe yiMilford ngo-R12 million. Leli qembu belikhungethwe yinkinga yezimali. Emasontweni adlule kusabalale izindaba zokuthi izikhulu zoThongathi ziyabanga ngokudayiswa kweqembu.
“Uzokhumbula ukuthi iqembu laliphethwe nguNicholas Mkhize osewadlula emhlabeni. Ngemuva kokudlula kwakhe unkosikazi wakhe nondodana yibona abebephethe iqembu. Indodana ibingayizwa indaba yokudayiswa kweqembu. Ngakolunye uhlangothi unkosikazi ubefuna ukulifaka endalini. Nangempela unkosikazi ugcine elidayisile. IMilford FC imemezele ukudayiselana kwala maqembu emasontweni amathathu adlule. Lokhu kuholele ekutheni bathathe indawo yoThongathi kwiPremier’s Cup,” kuchaza umthombo.
ElaboHlanga lihoshe izindaba zokuthi indodana kaMkhize isiludlulisele enkantolo lolu daba.
Leli phephandaba lixoxe nesinye isikhulu sePremier Soccer League (PSL) esingafunanga ukudalulwa igama esilibeke ngembaba ukuthi angeke kusashintsha ukudaliselwana kwala maqembu.
ElaboHlanga linayo incwadi yePSL eqinisekisa ukudayiselana kwala maqembu amabili.
“Ngokwemithetho yeFifa izindaba zebhola ezivunyelwe ukuthi ziqulwe ezinkantolo. Uma kukhona ukungaboni ngasolinye kumele kusetshenziswe iPSL Dispute Resolution Chamber (DRC), umehluleli ozimele ngaphansi kweSafa noma iCourt Of Arbitration for Sports (CAS). Hhayi inkantolo. Isigungu esiphezulu sePSL siluhlalele udaba lokudayiselana koThongathi neMilford. Sithole ukuthi yonke imigudu ifanele ilandelwe. Yingakho sikuphasisile ukudayiselana kwamaqembu. Njengamanje akusekho okuzoshintsha,” kuchaza isikhulu sePSL.
ElaboHlanga lingakuqinisekisa ukuthi isigungu esiphezulu sePSL sithumelele uNompumelelo Hlumayo ongumnikazi woThongathi noDokotela uXanti Phuphuma incwadi eqinisekisa ukudayiselana kwamaqembu ngemvume yoqweqwe lommeli uMichael Murphy mhla ziyisithupha kuNtulikazi.
Isigungu esiphezulu sithole izindaba zokuthi bobabili abaphathi bayilandele yonke imigudu ka-article 14 oqukethwe yimithetho yiNational Soccer League handbook.
Iligi iphinde yaqinisekisa ukushintshwa kwamagama nendawo yokuzinza njengoba iMilford izosebenzisa indawo yaseRichards Bay.
Wonke amacala noma izikweletu ezibhekene noThongathi zizokapakela kuMilford.
Iligi iphinde yayalela uDokotela uPhuphuma ukuthi axhumane neligi ngokuphuthuma ukuze achazelwe ngezindaba ezithinta amabhuku eqembu ezimali, ukubhaliswa kwabadlali, uhla lwemidlalo, ukuphathwa kweqembu, ezokuphepha nemifaniswano.