Sekuzwela nasezinganeni ngokushoda kokudla
Isongeke embhedeni wesibhedlela esifundeni sase-Ethiopia esisenyakatho i-Tigray, intombazanyana encane ngomzimba idonsa kanzima ukuphefumula, njengoba uyise ephulula ubuso bayo obulimele futhi umama wayo ehlezi eceleni kwayo ekhala.
U-Tsige Shishay, ijezi lakhe aligqokile elibhalwe ukuthi “Ngimuhle” ngaphambili, uneminyaka eyi-10 ubudala kodwa unesisindo esiyi-10 kg (22 lb). Udokotela wakhe uthi uyafa, uyisisulu esisha sokushoda kokudla endaweni ehlaselwe iminyaka emibili yempi futhi ehlushwa isomiso.
“Simbhekile ngesikhathi ehamba, okubuhlungu,” udokotela wezingane uDkt Teklay Hagos esibhedlela i-Ayder Comprehensive Specialized Hospital enhlokodolobha yaseTigray iMekelle etshela abeReuters. Wayekhuluma ngesiNgisi ukuze abazali bakhe bangamuzwa ukuthi uthini ukugwema ukwandisa izinhlungu zabo.
Abasebenzi basesibhedlela i-Ayder bathi izingane eziyisishiyagalombili zashona ngoNhlaba. Ekupheleni kukaNhlangulana, ithimba leReuters lenza uhambo lwalo lokuqala eminyakeni emibili liya eTigray, okuyindawo lapho kwasuka khona umsindo. Ohambweni lwezinsuku ezine, bavakashela iMekelle namadolobha amabili, i-Abiy Addi kanye ne-Samre, bevakashela isibhedlela endaweni ngayinye kanye namakamu alabo abase besele dengwane.
Kwehla kancane ngezibhamu ngemuva kokumiswa kwezikhali ngoLwezi kulandela ukulwa iminyaka emibili phakathi kwamasosha esifunda kanye nebutho lase-Ethiopia namadlelandawonye alo, ingxabano eyaxosha abantu ezindlini zabo, yacekela phansi isivuno futhi yaphazamisa nosizo lokudla. Isomiso esingapheli siye sajulisa izinkinga. Cishe ingxenye yesihlanu yabantu abayizigidi eziyisithupha eTigray bebentula ukudla kakhulu ngoNhlolanja, kusho iWorld Food Programme (WFP) esizweni lapho abantu abayizigidi ezingama-20 kubantu abayizigidi eziyi-120 bethembele osizweni.
Ukugeleza kosizo oluya e-Tigray kuphinde kwaqala ngemuva kokuphela kukaLwezi kodwa kwamiswa okwesikhashana ekuqaleni kwalo nyaka. I-WFP kanye ne-US Agency for International Development (USAID), bobabili abangabaxhasi abakhulu, bathi bamise usizo kancane ngoba kukhona abaphazamisa imizamo yabo yokusiza abaludingayo. Uhulumeni wase-Ethiopia ukugxekile ukumiswa kosizo kodwa wathi uyaphenya ngezinsolo zokuphazamisa ukufinyelela kwalo kwabaludingayo.
I-WFP ne-USAID bathi basebenzela ukuqinisekisa ukuthi usizo lufinyelela kulabo abahlosiwe futhi bahlose ukuqalisa kabusha ukukhipha usizo ngokushesha okukhulu. I-WFP ithe inethemba lokuthi izoqala kabusha ngoNtulikazi kophezulu.