Sekuyoshiyana ukwenza kubaqeqeshi embangweni wokunyukela kuDStv
Uyashisa umbango esicongweni alikho iqembu elizibeke phansi emidlalweni
Uyashuba umbango wokunyukela kuDStv Premiership ngesizini ezayo kuMotsepe Foundation Championship.
Sekusele imidlalo emithathu ngaphambi kokuthi isizini yeMotsepe Foundation isongwe.
EzikaShaun Bartlett oyingwazi yeBafana Bafana, iCape Town Spurs zibambene neqembu elidabuka KwaNdebele eliphethwe nguBucs Mthombeni, iCasric Stars ngamaphuzu angama-53.
IPolokwane City nayo ayizibekile phansi ngamaphuzu angama-51. Intatheli yelaboHlanga isibhekela kabanzi lombango weMotsepe Foundation Championship.
ICape Town Spurs:
ISpurs isiqoqe amaphuzu angama-53 emidlalweni engama-27 yeligi. Ihlezi esicongweni ngomehluko wamagoli kwazise ibambene neCasric Stars ngamaphuzu afanayo ngemuva kwemidlalo efanayo. ISpurs iyona esibhakuzise enethini amagoli amaningi emidlalweni yeligi. Isihlohle angama-38. U-Ashley Cupido usebasele enethini ali-14. Ulandelwa nguMoosa usebhakuzise enethini ali-10. ISpurs iphinde ibalwe namaqembu asengenelwe amagoli amancane kulesi sigaba.
Amaqembu ezobhekana nawo emidlalweni yokugcina:
Kusasa ngoMgqibelo ngo-3 ntambama eThohoyandou Stadium:
- Venda Football Academy v Cape Town Spurs
Mhla ziyisikhombisa kuNhlaba ngo-3 ntambama eDobsonville Stadium:
- La Masia v Cape Town Spurs
Mhlaka ziyishumi nane kuNhlaba ngo-3 ntambama e-Athlone Stadium:
Cape Town Spurs v Pretoria University.
Irekhodi lasekhaya:
ISpurs siwunqanduqandu uma sidlala ekhaya. Sesinqobe imidlalo eli-12 sadliwa kwemibili kuphela. Sishaywe yiJDR nePretoria Callies. Wonke amaqembu avakashela eKapa ngaphandle kwalawa amabili abuya eshwiba izandla. Njengamanje isalelwe ngumdlalo owodwa. Izovala neTuks ekhaya mhla zilishumi nane kuNhlaba.
Irekhodi lasekuhambeni:
ISpurs asinalo irekhodi elihle ekuhambeni. Sesidliwe imidlalo emine, sadlala ngokulingana kwemidlalo sanqoba emine. Imidlalo yayo emibili elandelayo isekuhambeni. Izobhekana neVenda Football Academy neLa Masia.
Ekudingayo ukuze idle ubhedu:
Idinga ukunqoba yonke imidlalo yayo esele. Lokho kuzosho ukuthi ngeke bathembele kweminye imiphumela.
ICasric Stars:
Imangaze inqwaba yabathandi bakanobhutshuzwayo. Leli qembu lidlala okokuqala kulesi sigaba. Lithenge isitifiketi seFree State Stars. Akekho obezitshela ukuthi kungashaya lesi sigaba sesizini lisembangweni wesicoco. Iningi belizitshela ukuthi iCasric izovika izembe. Kule sizini iyona esangenelwe amagoli amancane (21) kunawo wonke amaqembu adlala kuMotsepe Foundation. UKgomotso Mosadi nguyena osephenduke isibani seqembu ngamagoli akhe amqoka useshaye amagoli ali-11.
Amaqembu ezobhekana nawo emidlalweni yokugcina:
Namuhla ngo-3 ntambama eTut Stadium:
Pretoria Callies v Casric
Mhla ziyisikhombisa kuNhlaba eSolomon Mahlangu Stadium ngo-3:
Casric Stars v Venda Football Academy
Mhla ziyishumi nane kuNhlaba eTsakane Stadium ngo-3 ntambama:
All Stars v Casric Stars
Irekhodi lasekhaya:
ICasric ayigayelwa mphako emidlalweni yasekhaya. Isinqobe imidlalo eli-11, yadliwa kowodwa yadlala ngokulingana kwemibili. Izovala ngeVenda mhla ziyisikhombisa kuNhlaba.
Irekhodi lasekuhambeni:
Isidlale ngokulingana imidlalo eyisithupha, yanqoba emine yadliwa emithathu.
Ekudingayo ukuze idle ubhedu:
Idinga ukuthi iSpurs iqhukuze bese inqoba yonke imidlalo yayo esele.
IPolokwane City:
IPolokwane isele ngamaphuzu amabili kuCasric Stars nakuSpurs abaqhwakele. Leli qembu like lahlala esicongweni isikhathi eside. Libambane neSpurs ngamagoli angama-38.
Amaqembu ezobhekana nawo emidlalweni yokugcina:
NgeSonto ngo-3 ntambama e-Old Peter Mokaba Stadium:
Polokwane City v Uthongathi FC
Mhla ziyisikhombisa kuNhlaba ngo-3 ntambama e-Olen Park:
Platinum City Rovers v Polokwane City
Mhla ziyishuminane kuNhlaba ngo-3 ntambama e-Old Peter Mokaba Stadium:
Polokwane City v Pretoria Callies
Irekhodi lasekhaya:
Banqobe eyisishiyagalolunye, badliwa kowodwa badlala ngokulingana kwemithathu. Izobhekana noThongathi neCallies emidlalweni emibili yokugcina yasekhaya.
Irekhodi lasekuhambeni:
Isidliwe imidlalo emihlanu, yanqoba eyisithupha yadlala ngokulingana kwemithathu.
Ekudingayo ukuze idle ubhedu:
Idinga ukuthi iCasric neSpurs baqhuzuke bese inqoba imidlalo yayo esele.