UDu Plessis ubafaka ingcindezi abaqeqeshi
Uyaqhubeka nokufaka ingcindezi kuRob Walter nethimba lakhe labaqeqeshi uFaf Du Plessis osefomini eyisimangaliso emidlalweni yeT20.
Njengamanje uDu Plessis oke wabangukaputeni wamaProteas eminyakeni eyedlule kuzo zonke izinhlobo zikhilikithi eNingizimu Afrika ugijima kuRoyal Challengers Bangalore (RBC) eyibamba ku-Indian Premier League (IPL).
Kuleli qembu uvula nensika yaseNdiya, uVirat Kohli. Kusukela uDu Plessis athatha umhlalaphansi emidlalweni yama-Test nakweyosuku olulodwa akakaze aphinde abizwe kweyeT20. Ifomi yakhe enhle emiqhudelwaneni eyahlukene yeT20 isiqubule imibuzo ngekusasa lakhe kumaProteas.
Njengamanje nguyena odlubha ikepisi eli-orange ku-IPL. Leli kepisi ligqokwa ngumdlali osuke enama-runs amaningi kulo mqhudelwano. UDu Plessis nguyena ozihola phambili ngama-runs ku-IPL kulo nyaka wezi-2023. Usebhalise ama-runs ama-253 emidlalweni emihlanu esayidlale ku-RCB.
Useshaye o-50 ababili. Ngabe isipiliyoni sikaDu Plessis sizodingeka uma iNingizimu Afrika isibhekisa amabombo e-USA naseWest Indies okungamazwe amabili azosingatha iNdebe yoMhlaba yeT20?
Njengamanje uQuinton De Kock noReeza Hendricks yibona abavulayo emidlalweni yeT20. Bobabili la badlali benza umsebenzi omuhle. Umbuzo ngothi uma ebuya uDu Plessis uzodlala kuyiphi indawo.
URile Rossouw useyenze eyakhe indawo yokubhetha endaweni yesithathu. Leli nxele likwazi ukuthola ama-runs ngesivinini kanti liqinisa uhla lokubhetha lweNingizimu Afrika ngokwenza isiqiniseko sokuthi kuhlale kunobhetha ngenxele nesokudla enkundleni.
Isikhathi esiningi abashwibi abakuthakaseli ukubhethela abadlali abasebenzisa izandla ezingefani. Ukaputeni weqembu u-Aiden Markram naye wenza ezibukwayo endaweni yesine. Kulezi zinsuku uvutha engabaselwe.
UDu Plessis kunzima ukubona ukuthi uma ebuya angabuya angene kuphi kulolu hla lokubhetha lwamaProteas ngoba noDavid Miller uyibambe ngesinono endaweni yesihlanu.
Ukubiza umdlali ofana noDu Plessis bese umhlalisa ebhentshini angeke kuwenze umqondo. Uyinsika yomdlali kanti uma umbuyisela eqenjini lesizwe kule minyaka akuyona kumele kube wukuthi uzozitamuzela ngesikimu.
Akwaziwa ukuthi uWalter nezakhe bazophetha ngaliphi. Banesikhathi esingangonyaka ukwenza lesi sinqumo esinzima kangaka.
