Ungena khaxa kuyoyonke imikhakha uKhabonina
Njengoba sekubalwa izinsuku ukuba isongwe iNyanga Yabesifazane ezweni singekhohlwe ukubalula omunye obambe elikhulu iqhaza ekuqhakambiseni imisebenzi yabo negalelo lembokodo esizweni. Akulula ukuchaza uKhabonina Qubeka njengoba engene wagamanxa emikhakheni eminingi. Ungumdansi, umethuli wezinhlelo kuthelevishini, umlingisi, umkhangisi, umqeqeshi wokuzivocavoca, umculi nosomabhizinisi.
Kuyona yonke le mikhakha usezakhele igama futhi ungene kwezwakala. Iningi labalandeli bakhe liqale ukumbona elingisa indawo kaDoobsie emdlalweni owuchungechunge wethelevishini iMuvhango elingisa indawo kaDoobsie. Waba ngumlingisi wesithathu ukudlala le ndawo emuva kukaLindiwe Chibi owadlula emhlabeni emuva kokudutshulwa isoka lakhe, kwalandela uKhanyi Mbau owaxoshwa emuva kokushaya udaka. Le ntokazi yazalwa zingama-22 kuMasingana ngowe-1981 e-Orlando West, eGoli. Waqala imfundo yamabanga aphansi kuyona le ndawo waze waphothula. UneDiploma kuMoving into Dance.
Uselingise emidlalweni eminingi okubalwa kuyo isidingo elingisa indawo yesigebengu uNina Zadela ngowe-2017, waphinde wadlala kuThe Wild enguMaxine. Njengomdansi oqeqeshiwe useke waqokwa njengejaji emincintiswaneni eminingi kuthelevishini okukhona kuyo iDance Your Butt Off kuSABC1, iStep Up or Step Out ku-eTV, waphinda waba ngumqondisi wabadansi kwimiklomelo iChannel O Music Awards. Abesilisa abaningi bayazifela ngale ntokazi kodwa yona iyaye ingathandi ukukhuluma kakhulu ngezindaba ezithinta impilo yayo yangasese.
Njengomlingisi uKhabonina usezuze imiklomelo eminingi okukhona oweBest Actress iBoston International Film Festival Awards ngowe-2017, iBest Actress ku-Africa Movie Academy Awards. Noma esedlondlobele kangaka kodwa akakhohliwe ilapho ephuma khona njengoma emalokishini ugqugquzela intsha ukuba izivocavoce, abe namakilasi okuzivocavoca.