Ubona lusekude uxolo phakathi kweRussia ne-Ukraine owase-UKZN
USolwazi uDorcas Ettang ofundisa ezepolitiki eNyuvesi yaKwaZulu-Natal uthe okwamanje iRussia ne-Ukraine ziqhelelene kakhulu ukuthi zingacubungula noma yiluphi uhlobo lokulamula. Ukumiswa kancane kwezikhali okwamenyezelwa yiRussia izolo kubikwa ukuthi kubhuntshile.
UMnyango Wezokuvikela WaseRussia umemezele ukuthi amabutho awo eningizimu ye-Ukraine azoyeka ukudubula kwawo emadolobheni iMariupol neVolnovakha ukuze avumele imigudu yokusiza abantu kanye nokuphuma kwezakhamuzi. IMoscow neKyiv basolwa ngokuhweba ngohlelo oluhlulekile lokuqeda ukulwa.
USolwazi u-Ettang uthi kubalulekile ukucabanga ngabantu abangenacala impilo yabo esengozini. “Impi, izikhathi eziningi ithinta labo abangekho etafuleni lokuthatha izinqumo, labo abangakwazi ukuveza izwi labo ezimeni ezisemthethweni nezingxoxo.
Ngakho-ke, ngicabanga ukuthi kubalulekile ukwamukela ubunxusa, ukubeka isimo sezakhamuzi zase-Ukraine nokuphepha kwazo etafuleni, ukucabangela izakhamuzi nokuphepha kwazo. Kubalulekile ukwamukela ubunxusa futhi sifinyelele esinqumweni sangempela, sizimisele ukwenza isivumelwano ukuze kube nokuthula kwesifunda.
“IRussia ithe amasosha ayo ayeke ukudubula eduze kwamadolobha amabili avinjezelwe e-Ukraine ngoMgqibelo ukuze avumele izakhamuzi ezibalekela ukulwa, kodwa izikhulu kwelinye lamadolobha zathi iMoscow ibingakubheki ngokugcwele ukumiswa kwezikhali okulinganiselwe.
UMnyango Wezokuvikela WaseRussia uthe amayunithi awo avule imigudu yokusiza abantu eduze namadolobha iMariupol neVolnovakha abezungezwe amasosha awo, njengoba ukuhlasela kweRussia e-Ukraine kungena osukwini lweshumi.
Kepha eMariupol, uMkhandlu Wedolobha uthe iRussia ibingakubheki ukumiswa kokudubula futhi yacela izakhamuzi ukuthi zibuyele ezindaweni zokukhosela zilinde eminye imininingwane mayelana nokuphuma kwabantu. UMnyango Wezokuvikela WaseRussia usole “abashisekeli bezwe” base-Ukraine ngokuvimbela izakhamuzi ukuthi zihambe.