EzikaBoucher zidlale ngomsebenzi wabashwibi
AmaProteas adlale ngomsebenzi omuhle wabashwibi osukwini lwesibili lomdlalo weTest yesibili ephakathi kwelakuleli neqembu lesizwe lekhilikithi laseNdiya. EzikaMark Boucher zishaye into ecokeme ngosuku lokuqala e-Imperial Wanderers, eGoli.
Ngemuva kokuthi ibamba likakaputeni waseNdiya uKL Rahul ewine ithosi wase ethatha isinqumo sokubhetha kuqala elakuleli lizikhiphe zonke izitha zisabhalise ama-run angama-202 ebhodini. UMarco Jansen uthathe amawikhethi amane kwathi uKagiso Rabada noDaunne Olivier bahlomula ngamathathu umshwibi ngamunye.
URahul nguyena obeyinsika ku-Innings yokuqala yelaseNdiya ehlohla ama-run angama-50. AmaProteas avale usuku lokuqala esalahlekelwe yiwikhethi eyodwa ka-Adien Markram okhishwe nguMohammed Shami nge-Leg Before Wicket (LBW) esashaye ama-run ayisikhombisa. UDean Elgar noKeagan Petersen yibona abavale usuku besenkundleni.
UPetersen uqhubeke lapho eshiye khona osukwini lokuqala. Uzitholele u-50 wakhe wokuqala egqoke imifaniswano yeqembu lesizwe emidlalweni yamaTest. Nokho ugcine ekhishiwe ngemuva kokwenza umsebenzi oncomekayo. Ukhishwe nguShardul Thakur esenze ama-run angama-62. Ngaleso sikhathi ubeyibambe kahle kodwa wavele wavukwa yidimoni edlala ibhola ebelikude naye. Ulithinte kancane wabanjwa nguMayank Agarwal. U-Elgar naye ubone afike ngayo ngesikhathi ekhishwa nguThakur obevutha engabaselwe. Uphume eseshaye amarun angama-28.
UTemba Bavuma noKyle Verreynne bazamile ukuhlanganisa izinto ngemuva kokuwa kwamawikhethi ubuthaphuthaphu kodwa bathe uma sebethola umgqigqo bavele balahla amawikhethi abo. UBavuma ushaye angama-51ngemuva kwalokho wadlala ibhola elingenasidingo okuholele ekutheni abanjwe nguRishabh Pant kade kushwiba uThakur.UVerreynne naye ukhishwe nguThakur ogcine ethathe amawikhethi ayisikhombisa. Ubesehlanganise ama-run angama-21.
AmaProteas agcine ephume wonke esehlanganise ama-run ama-229 kuma-over angama-80. Abehamba phambili ngama-run angama-28. Nokho ayeke ithuba elihle lokukweletisa elaseNdiya ngama-run angaphezu kwangama-50. INdiya igcine ivale usuku lwesibili isiyenze ama-85 kusawe amawikhethi amabili ngemuva kwama-over angama-20. Kuphume uRahul (8) no-Argawal (23). Amawikhethi abo athathwe nguMarco Jansen noDaunne Olivier ngokulandelana. UCheteshwar Pujara (35) no-Ajinkya Rahane (11) yibona abazovula usuku lwesithathu.
ElaseNdiya lihamba phambili ngama-run angu-58 kanti lisalele ngamawikhethi ayisishiyagalombili. Njengamanje zibambene kwazise akucaci ukuthi umdlalo uzophelela ngakuphi. AmaProteas alandela emuva ngo 1-0 ngemuva kokuguqiswa ngama-run angu-113 kowokuqala obuseSuperSport Park. Yingakho kumqoka ukuthi anqobe lomdlalo wesibili ukuze aye eKapa esethubeni lokunqoba lolu chungechunge lwemidlalo emithathu yama-Test ngo 2-1.
Elakuleli kalikaze lishaywe elaseNdiya lapha ekhaya emidlalweni yamaTest.