Ingxoxo ekhethekile: Isifiso sikaTso Vilakazi ngoKomphela kweZimnyama
EZimnyama zisanda kukhomba indlela uJosef Zinnabuer obepheka iqembu ngemuva kokuthelwa othulini yiSwallows ku-quarterfinal yeMTN8 e-Orlando Stadium ngempelasonto edlule. UFadlu Davids noMandla Ncikazi yibona ababambe izintambo iqembu lize lithole umqeqeshi omusha.
Omunye wabadlali abahlonishwayo kuleli uBenedict “Tso” Vilakazi exoxa nelaboHlanga uphefumule ngesifiso sakhe sokubona uSteve Komphela ethatha isikhundla sokulolonga eZimnyama.
“IPirates yiqembu elikhulu. Uma ungumqeqeshi uyothatha izintambo kuPirates lokho kumele ukwazi. Into oyenzayo kumqoka ukuthi uyazi. Lapha azifuneki izimfundamakhwela ngenxa yengcindezi ehambisana nesikhundla sokucija iPirates. Leli qembu lidinga umqeqeshi ozokwazi ukuletha izicoco. Inkanyezi yesibili iyadingeka ebhejini lePirates. Ngokwami umqeqeshi ongakwazi ukwenza lokho nguSteve Komphela,” kubeka uVilakazi owanqoba isicoco seligi nePirates ngowezi-2002/03.
UKomphela usanenkontileka neMamelodi Sundowns ayijoyine ngesizini edlule esuka kuLamontville Golden Arrows.
“IPirates idinga ukubuyela ezingeni layo. Uma ngikhuluma ngezinga layo ngiqonde ukuthi kumele ilwele ukunqoba izicoco. Asikwazi ukubuka iSundowns icanasa njengoba yenza. Kumasizini amane adlule iyona eziwinele kalula isicoco seligi. IPirates kumele iqede lokho kucanasa. Izinto kumele zishintshe. IPirates ayaziwa ngokuphelezela izimbangi zayo,” kucacisa uVilakazi.
Ngaphambi kokuthi kuqale isizini bekunamahebezi okuthi uKomphela kungenzeka ajoyine iPirates kodwa kwavela ukuthi iSundowns ifuna itshe lemali ukuze imdedele.
“USteve angawenza umsebenzi kuPirates ngoba inkinga wukuthi inkontileka yakhe inombandela ophoqa izisheli zakhe ukuthi zihlukane nezindlodla zemali. Useke wayibamba emaqenjini amakhulu nawesizwe. Uyayazi ingcindezi ehambisana nokuhola iqembu elikhulu,” kusho uVilakazi.
Ngemuva kokugila izimanga neLamontville Golden Arrows iningi labathandi bebhola likholwa wukuthi iPirates kumele inikeze uMandla Ncikazi ithuba lokubamba izintambo ngokugcwele.
“Angimbukeli phansi umqeqeshi uMandla Ncikazi. Abantu ngicela bangizwe kahle. Asingamfaki ngaphansi kwengcindezi engenaso isidingo. IPirates ngiyazi ukusuka nokuhlala futhi ngidlale kuyona iminyaka, likhulu leli qembu. Naye uNcikazi ngiyamazi. Namagalelo akhe ngokunjalo ngiyawazi. Umkhumbi wePirates mkhulu. Anginaso isiqiniseko sokuthi uNcikazi usekulungele ukuwushayela njengamanje,” kusho uVilakazi.
Abaningi bakholwa wukuthi uNcikazi ubezofunda usikompilo lweqembu bese ethatha izintambo zokuqeqesha kuZinnabuer.
“Uma iPirates igcina ngokuthatha isinqumo sokunika uNcikazi isikhundla sokuqeqesha iqembu, kumele bamnika inkululeko yokuqoka umqeqeshi afuna ukusebenza naye. Uma bengenza njalo angingabazi ukuthi singaqala sibone izimpawu zokuthi uliphatheleni iqembu,” kuqhubeka uVilakazi.
IPirates izobhekana neStellenbosch ngoMgqibelo ngehora lesi-3 ntambama emdlalweni wokuqala weDStv Premiership.
“Ngokwami into emqoka wukuqoka umqeqeshi osifanele lesi sikhundla. Kimina akubalulekile ukuthi uphuma kuliphi izwe kodwa kumele kube ngumqeqeshi ovela kuleli. IPirates ike yamnika uRhulani Mokwena ithuba kodwa izinto zangamhambela kahle. Yingakho ngithi iqembu alinike isikhundla umuntu osifanele.” kuphetha uVilakazi.
UDavids noNcikazi yibona abazobamba izintambo ngempelasonto.