IPSG igile iBarca phambi kwezinkumbi zabalandeli bayo
IPSG iphendukele iBarcelona esiswini njengotshwala emdlalweni womlenze wesibili we-Uefa Champions League obuseCamp Nou izolo ebusuku.
AmaCatalans anqobe ngo 3-2 emlenzeni wokuqala eParis. Angene kowesibili ehambela phezulu.
Nangempela umdlalo awuqale kahle. URaphinha ubeke iqembu lasekhaya phambili ngomzuzu weshumi nambili umdlalo uqalile.
IBarca igqemeke engeqiwa ntwala ngesikhathi uRonald Araújo ethola ikhadi elibomvu ngomzuzu wamashumi amabili nesishiyagalombili.
Sekuzoyiwa ekhefini u-Ousmane Dembélé uvalele enethini igoli lokulinganisa okunike iPSG amathemba okuphendula amatafula.
Zithe zibuya nje ekhefini uVitinha wabeka iPSG phambili.
UKylian Mbappe nguyena oqede ngeBarca evalela enethini amagoli amabili okugcina ePSG kulo mdlalo. Leli qembu laseFrance ligcine linqobe ngo 4-1 osukwini kwathi uma sekuhlanganiswe umphumela womdlalo wokuqala nowesibili lanqoba ngo 6-4.
Ngemuva kwalokho lidlulele kowandulela amanqamu eChampions League. Lijoyine iBorussia Dortmund eqhamuka kwelaMajalimane.
IDortmund ithele othulini i-Atletico Madrid ngo 4-2. Sekuhlanganiswe umphumela womdlalo womlenze wokuqala nowesibili iDortmund iphumele ngo 5-4. Kowandulela amanqamu izobhekana neDortmund.