UKekana uhamba neSundowns embangweni wesicoco seChampions League
Sekuphele iminyaka eyisishiyagalombili iMamelodi Sundowns izabalazela ukuthola isicoco sayo sesibili seCaf Champions League. Leli qembu liyazicanasela kuDSTV Premiership. Selinqobe isicoco seligi amahlandla ayisithupha elandelana.
Nakule sizini iSundowns iyazenzela. Isiyiphumelele yonke imidlalo yayo yeligi eyishumi. Abafana Ba Style bavule igebe lamaphuzu amahlanu esicongweni ekubeni basasele ngemidlalo emithathu.
Isicoco iSundowns esisibheke ngamehlo abovu yisicoco seCaf Champions League.
Muva nje, iBrazilians isanda kudla ubhedu ku-African Football League (AFL).
UHlompo Kekana okunguyena ukaputeni weSundowns owagcina ukuphakamisa isicoco seligi ngesikhathi leli qembu liguqisa iZamalek ngowezi-2016 utshele elaboHlanga ukuthi sekuyisikhathi sokuthi ezikaRhulani Mokwena ziqede lolu khondolo kuChampions League.
“Ngenhlanhla iSundowns isanda kunqoba isicoco se-AFL. Angingabazi ukuthi lokho kuzobafaka ugqozi lokuthi bangakwazi ukudla umhlanganiso kuChampions League. Ukudlala kuChampions League akulula neze,” kuchaza uKekana owaphakamisa neseCaf Super Cup ngowezi-2016 neSundowns.
Ngeledlule iSundowns iguqiswe yiTP Mazembe ngo 1-0 eLubambashi, eDRC Congo kowamaqoqo eChampions League.
Ngemuva kwemidlalo emibili isiqoqe amaphuzu amathathu. Ithele othulini Bumamuru yaseMauritania ngo 4-0.
Namuhla ngo-3 ntambama, iSundowns, izotholana phezulu nePyramids yaseGibhethe eLoftus Versfeld Stadium, ePitoli.
“Uma udlala kuChampions League ubhekana namaqembu adlala ngokwezitayela ezahlukene. Okumqoka wukuwahlelela kahle amaqembu ngendlela efanele. Uma uke wabamba lokho usuke usethubeni elihle lokwenza kahle. ISundowns isinesipiliyoni sokudlala kulo mqhudelwano. Isiyakwazi okumele ikwenze emazweni ahlukene. Empeleni angiboni okungama endleleni yeSundowns ukuthi inqobe lo mqhudelwano. Umgqigqo nje kuphela abawudingayo,” kubeka uKekana.
ISundowns nePirates yiwona kuphela amaqembu aseNingizimu Afrika aseke aphakamisa isicoco seChampions League.
EZimnyama zaba ngompetha ngowezi-1995 iqumba phansi i-Asec Mimosa yase-Ivory Coast.
“Njengamanje uma sikhuluma ngeqembu elingakwazi ukufinyelela kowamanqamu bese liphakamisa isicoco seChampions League sikhuluma ngeMamelodi Sundowns. Konke lokhu kuza nengcindezi kodwa yingcindezi emnandi. Isikhathi sesiside. Siyadinga iqembu elizoqeda leli shobolo. Ukunqoba kwethu iChampions League kwanikeza amaqembu amaningi ithemba lokuthi nawo angakwazi ukukhonya kulo mqhudelwano.” kuvala uKekana.