IMeya ifuna sande isibalo sabagijima oweMfundo Arnold Lushaba Half Marathon
IMeya yaseMzumbe ngaphansi kweSifunda Ugu, uBongani Nyuswa womjaho owaziwa ngeMfundo Arnold Lushaba Half Marathon, ufuna ukhule ufane neminye ehlonishwayo lapha esifundazweni iKwaZulu-Natal.
Umjaho wakulo nyaka uthulwe ngokusemthethweni ngoLwesihlanu, nalapho okumenyezelwe usuku ozogijinywa ngalo. Nonyaka lo mqhudelwano uzogijinywa mhla zingama-23 kuNhlolanja, uzobe usuka Esibanini Sportfield ngaphandle, usongwe khona Esibanini Sportfield ngaphakathi.
“Kuyisifiso sethu esikhulu ukuba sibone lo mjaho ukhula. Siyafisa ukubona abagijimi ukuba bezibekisele indawo kwiComrades Marathon ngawo lo mjaho esawuqamba ngokuthi iMfundo Arnold Lushaba Half Marathon. Ukuze kube njalo kumele siwenze ungabe usaba iHalf Marathon, kodwa ube iMarathon ukuze iphupho lethu lizofezeka. Akuyonake into yamanje kodwa, ekuhambeni kwesikhathi sinethemba lokuthi izinguquko zizokwenzeka” kubeka uNyuswa.
Ngokomlando lo mjaho waqala ngowezi-2019 uyiFun Run, wama ngenxa yokhuvethe wakhuza ibuya ngowezi-2022 usuwu-10km nangowezi-2023, kuthe nyakenye waba nebanga lika-10km nelika-21km. Ngokulandelayo sifuna kube ibanga lika-10km, elika-21km mese siba neMarathon.
Ngesikhathi uqala lo mjaho wagijinywa abantu abangama-30, kodwa nyakenye ugijinywe abama-203.
“Kulo nyaka sinesifiso sokuthi abasubathi babe ngaphezulu kwamakhulu amahlanu, njengoba ngishilo sifuna linyuke kakhulu izinga lalo mqhudelwano. Engikukhuthazayo ukuthi abasubathi balapha endaweni kube yibo ababhalisayo, ukuze sizosenza lesibalo esisifisayo” kubeka uNyuswa.
Ukubhalisela ukungenela lo mjaho kwaqala mhla zili-13 kuZibandlela kuzoze kuvalwe mhla zili-17 kuNhlolanja.
Ngaphansi kweSifunda Ugu ukhona umsubathi osezenzele igama uMncedisi Mkhize owaphuma endaweni yesithathu kwiComrades Marathon ngonyaka wezi-2007 (5:32:50).