Ezimnyama zisophe ukuqopha umlando ngokuvikela isicoco
Umqeqeshi we-Orlando Pirates, uJose Riveiro, ugaqele ingqayizivele yethuba lokuqopha umlando neZimnyama kuMTN8.
EzikaMagebhula yizona ezivikela isicoco seMTN8. Ngesizini edlule ziqumbe phansi AmaZulu FC ngo 1-0 wegoli likaMonnapule Saleng kowamanqamu owawuseMoses Mabhida Stadium, eThekwini.
IPirates ivutha ingabaselwe kulo mqhudelwano. Ilobole iSekhukhune ngo 5-0 kuma-quarterfinal.
Kuthe kusabatshazwa lokho yathela othulini iStellenbosch ngo 2-1 emlenzeni wokuqala emdlalweni owandulela amanqamu eKapa.
IBhakaniya selibheke ukuqedela umsebenzi phambi kwabalandeli balo eSigodini sikaMaminzela, eSoweto.
Uma liphumelela ukufinyelela kowamanqamu lizozibeka ethubeni elihle lokuvikela isicoco.
Kusukela lo mqhudelwano waqala ukuxhaswa ngabakwaMTN ngo-2008, iPirates yilona kuphela iqembu eselake lakhala lemuka nezigidi eziyisishiyagalombili zamarandi amasizini amabili elandelana.
Ngowezi-2010, ezikaMagebhula zagebhula iMoroka Swallows sekukhahlelwa amaphenathi eMoses Mabhida Stadium, eThekwini. URuud Krol nguyena owayehlezi ebhentshini.
Ngesizini elandelayo akalitholanga ithuba lokuvikela isicoco. UJoel Leal odabuka eBrazil wabingelela ngesicoco sayo iMTN8 kulandela ukuthatha izintambo kuKrol ngowezi-2011.
Waguqisa iKaizer Chiefs ngo 1-0 wegoli lika-Oupa “Ace” Manyisa eFNB Stadium, eSoweto, eGoli.
Ngemuva kwalokho alikho elinye iqembu eselike lakwazi ukuvikela isicoco salo. URiveiro usethubeni lokuba ngumqeqeshi wokuqala emlandweni weMTN8 ukuphakamisa lesi sicoco amasizini amabili elandelana.
Lo mqeqeshi odabuka eSpain akayazi induku emidlalweni yemikhumulajezi kusukela ethathe izintambo zokulolonga eNingizimu Afrika kweZimnyama.
Ngesizini edlule uqukule eseMTN8 neNedbank Cup. USteve Barker ocija iStellies uzobe ebheke ukona umcimbi weZimnyama ngokuphendula amatafula ngeSonto ngo-3 ntambama e-Orlando Stadium, eSoweto.
Ezakhe zidinga amagoli amabili angaphenduliwe ukuze zizibekisele indawo kowamanqamu.
UBarker nezakhe bazoqonda kahle ukuthi angeke kubelula ukuzuza lokho kwazise iBucs ayingayelwa mphaka e-Orlando. IPirates isidlale imidlalo emine ekhaya kule sizini entsha kuyo yonke imiqhudelwano. Isiyinqobe yonke.
Ibhambabule iRoyal AM ngo 4-2, yaqasabula iSekhukhune ngempama (5-0), yamuhluza iDjabal ngo 3-0 ngaphambi kokubhuquzisa iCape Town City ngo 2-0.
IStellenbosch sigaqele isicoco sayo sokuqala ezingeni eliphezulu. UBarker naye usathungatha isicoco sakhe sokuqala.
Ozonqoba kulo mdlalo uzobhekana nozodla ubhedu phakathi kweMamelodi Sundowns neKaizer Chiefs abazotholana phezulu eLucas Moripe Stadium kusasa ngo-3 ntambama.
Umlenze wokuqala walo mdlalo owandulela amanqamu eWafa Wafa uphele kungekho efuna ukugoba uphondo. Lezi zinkunzi zamaqembu amabili zibambane ngo 1-1 eFNB Stadium emasontweni amabili adlule.
UMolefi Ntseki opheka Amakhosi noRhulani Mokwena oshayela umkhumbi weBrazilians babhekene nenkulu ingcindezi.
UNtseki othathe indawo ka-Arthur Zwane unuka iqaqa kubalandeli beMpofana. Sebeke bamjikijela bengagculisekile ngemiphumela yeqembu.
Kusasa unethuba lokufaka iChiefs kowamanqamu okokuqala eminyakeni emine.
Leli qembu selokhu lagcina ukufika kowamanqamu ngowe-2019 liguqiswa yiTS Galaxy ngo 1-0 wegoli likaZakhele Lepasa eMabhida ngaphansi kobuholi buka-Ernst Middendorp.
Ngemuva kwalokho Amakhosi awakaze aphinde afinyelele kowamanqamu. Angisayiphathi-ke eyokunqoba isicoco. Yinto ayigcina ngowe -2014 ngayo iMTN8 kusekhona uStuart Baxter.
KuMTN8, iChiefs igcine ukudlala kowamanqamu ngowe-2015 icijwa nguSteve Komphela. Yakhala ngaphansi ku-Ajax Cape Town ngo 1-0 wegoli likaNathan Paulse eNelson Mandela Bay Stadium, eGqeberha.
UNtseki usethubeni lokuqeda lamashobolo eKhosi ngokulifaka kowamanqamu bese elibeka ethubeni lika-R8 million.
UMokwena angeke avume kalula kanjalo. Wazi ukuthi umonakalo odalwe yisibhaxu esigabeni esifanayo emqhudelwaneni ofanayo ngesizini edlule besayibambe noManqoba Mngqithi.
Ngakho uMokwena ubuqonda kahle ubumqoka balo mqhudelwano. Ngesizini edlule ugcine enqobe isicoco seligi kuphela. Ngokwezinga leSundowns lokho akwanele. Kule sizini kuzomele ibhukule. Lowo mshikashika uqala khona kusasa kuyona iMTN8.
ISundowns yabhabhadiswa yiPirates ngo 3-0 emzuliswaneni wesibili weMTN8. Ngemuva kwalokho kwenziwa izinguquko ezinqala ebhentshini laBafana Ba-Style. UMngqithi wehliswa esikhundleni izintambo zanikwa yena uMokwena obeselekelwa nguSteve Komphela osanda kushiya.
Akwaziwa ukuthi iyozala nkomoni kodwa yona iyolala ibonene.