Kuzoshiyana ukwenza omkhaya bedudulana kuMotsepe Foundation
Izovulwa ngomdlalo wabakhaya isizini entsha yeMotsepe Foundation Championship. Namuhla ngo-7.30 ebusuku, iMaritzburg United izokwamukela iMilford Football Club emdlalweni wabakhaya baKwaZulu-Natal (KZN) ozoba seKing Zwelithini Stadium, eMlaza.
ITeam of Choice idliwe yizembe ngesizini edlule kuDSTV Premiership. Iqede endaweni yeshuminanhlanu. Yehlele emidlalweni yokuhlunga kodwa kwafika kwabhimba nakuyona.
Yenze inqwaba yezinguquko. Ihlukane nomqeqeshi uFadlu Davids nethimba lakhe. Iphinde yalahlekelwa yinqwaba yabadlali abanegama okubalwa kubona uRowan Human othengwe AmaZulu FC, Brandon Cross osegijima kuLamontville Golden Arrows, Travis Graham, u-Ali Meza, uWayde Jooste, uRenaldo Leaner, uKarim Kimvuidi, noBonginkosi Makume.
Leli qembu liqashe uZipho Dlangalala njengomqeqeshi omusha weqembu. Ulekelwa nguSimo Dladla osenesipiliyoni kuMotsepe Foundation.
UTshepo Gumede ojoyine iTeam of Choice kule sizini utshele elaboHlanga ukuthi bafuna ukuqala ngegiya eliphezulu.
“Sizimisele ngokuvula ngamaphuzu amathathu. Sizobe sidlalela phambi kwabalandeli bethu. Asinazo izinhloso zokubaphoxa. Yingakho sibacela ukuthi baphume ngobuningi babo. IMaritzburg ayikufanele ukudlala kule sigaba kodwa yithina okuzomele siyibuyisele lapho ifanele khona,” kuchaza uGumede.
Ngesizini edlule uGumede ubegijima kuMarumo Gallants nayo egcine igawulwe yizembe.
Lesi sitobha sibambe elikhulu iqhaza iGallants ifinyelela kowandulela amanqamu eCaf Confederation Cup. Phambili uke wayibamba ku-Orlando Pirates.
“Iqembu lethu lakhiwe ngabadlali abancane nabadlali abanesipiliyoni. Okwethu njengabadlali asebenesipiliyoni wukuhola labadlali abancane.
Into emqoka kunayo yonke kule sizini kuzoba wukunqoba imidlalo yasekhaya. Akumele sidedele lutho ekhaya. Kumele sishaye kwasani ukuze sandise amathuba ethu okubuyela esigabeni esiphezulu ngesizini ezayo. Siyazi ukhalo luselude. Angeke kubelula kodwa uma sibambisene sizophumelela,” kusho uGumede.
IMilford ithenge isitifiketi soThongathi obekade ludlala kulesi sigaba. La maqembu ake atholana phezulu kuKZN Premier’s Cup. Kugcine kunqoba iTeam of Choice sekukhahlelwa amaphenathi.