Izoconsisa amathe eyandulela owamanqamu eNedbank Cup
Basathunga izicoco zabo zokuqala kuPremier Soccer League (PSL) abaqeqeshi abathathu kwabane abazolwela ukuzibekisela indawo kowamanqamu weNedbank Cup.
Imidlalo eyandulela amanqamu eNedbank Cup izodlalwa ngoNhlaba. IPSL isazomemezela izinkundla nezikhathi okuzodlalwa ngazo imidlalo emibili eyandulela amanqamu.
Iqembu elizodla ubhedu kulo mqhudelwano lizohlabana ngesamba sika-R7 million bese lithola nengqayizivele yethuba lokuyodlala kuCaf Confederation Cup ngesizini ezayo. Intatheli yelaboHlanga, uZipho Singela isibhekela okuzokwenza imidlalo eyandulela amanqamu ihlabahlose.
U-Arthur Zwane: Uthathe izintambo ngokugcwele njengomqeqeshi weKaizer Chiefs ekuqaleni kwesizini. Unikwe inkontileka yeminyaka emithathu. Kusukela ethathe izintambo asikho isicoco asasilethe ekhathebeni lezindebe eNaturena. Uvele usephuthwe yisicoco seligi. Inqontshwe yiMamelodi Sundowns okwesikhombisa kulandelana. KuMTN8 ukhishwe ngaMaZulu kowandulela amanqamu. IWafa Wafa igcine iphakanyiswe yi-Orlando Pirates. IChiefs iqhathwe nabakhaya yabo abadala, i-Orlando Pirates kowandulela amanqamu ozoba senkundleni esazomenyezelwa mhla ziyisithupha kuNhlaba. UZwane uvele useyiphuze inyongo iBhakaniya kule sizini. Uyishaye ekhaya waphinde wayishaya ekuhambeni. Kulokho uzobe esebheke ukuyiqumba phansi okwesithathu kulandelana. Uma ephumelela uzofinyelela okokuqala kowamanqamu njengomqeqeshi ozimele. Njengomdlali asikho isicoco angazange asinqobe neChiefs ngezikhathi zakhe. IChiefs sekuphele iminyaka eyisishiyagalombili iphikwa yizicoco.
UBrandon Truter: Nguyena onyuse iSwallows kumasizini amabili adlule edla umhlanganiso kuMotsepe Foundation Championship. UTruter yize eseke aphakamisa isicoco kuNFD kodwa kuPSL usazingela isicoco sakhe sokuqala njengomqeqeshi. Uqophe umlando ekhipha iChippa United kuma-quarterfinal. Kungokokuqala iSekhukhune United ingena kowandulela amanqamu emlandweni wayo. UTruter yena kungokwesibili kule sizini. Ekuqaleni kwesizini ufake AmaZulu kowandulela amanqamu eMTN8 ngaphambi kokuthi amkhombe indlela. Nangesizini edlule ufinyelele esigabeni esifanayo neSwallows emqhudelweneni ofanayo. UTruter bezakhe bazodudulana neStellenbosch eKapa enkundleni esazomenyezelwa. Uma enqoba uzobhekana neChiefs noma nePirates kowamanqamu. ISekhukhune nayo isathungatha isicoco sayo sokuqala esigabeni esiphezulu.
USteve Barker: Umangaze inqwaba ekhipha iMamelodi Sundowns evikela isicoco kulo mqhudelwano. Uyithele othulini ngamabili kwelilodwa e-Athlone Stadium ngempelasonto eyedlule. Njengamanje usezobhekana neSekhukhune kowandulela amanqamu. IStellenbosch asikaze safinyelela kowamanqamu phambili. UBarker uzobe ebheke ukuzibhalela umlando naleli qembu laseKapa elidlondlobala ngesivinini. UBarker uzothembela erekhodini lezakhe lasekhaya uma esebhekene neSekhukhune kowandulela amanqamu.
