Iya iyashuba eyeNdebe yoMhlaba



UMaphumulo uyintatheli yezemidlalo.
Iya ngokushuba imidlalo yeNdebe YoMhlaba ebanjelwe eQatar njengoba isingenele kweyamaQuarter-Finals (Last 8).
Kumaqembu ayisiyishagalombili asele mahlanu okungawase-Europe okuyiCroatia, iNetherlands, iPortugal, i-England nompetha boMhlaba iFrance, abe mabili aseSouth America okuyi-Argentina neBrazil, bese kusala elilodwa lalapha e-Africa iMorocco.
IMorocco okuyiyo ithemba le-Africa izotholana phezulu nePortugal, okuwumdlalo ongeke uze ube lula neze. Lo mdlalo uzokuba kusasa ngoMgqibelo ngelesi-5 ntambama, uzobanjelwa e-Al Thumama Stadium.
Lo mdlalo ngeke uze ube lula neze, kwazise la mazwe eza kuwona enokukhulu ukuzithemba kakhulukazi yona iMorocco. IThe Atlas Lions (iMorocco) iza kulo mdlalo imangaze umhlaba njengoba ihlule iSpain ngamagoli amathathu eqandeni sekukhahlelwa amaphenathi. ISpain esaba ngompetha boMhlaba ngowezi-2010 lapha eNingizimu Afrika, singelinye lamazwe obekubhekwe ukuthi lingahamba indlela ende kulo mqhudelwano njengoba siphethe abadlali abanamava.
Okunye okwenza iThe Atlas Lions ibe nokuzithemba ukuthi, nasemdlalweni yamaqoqo yenze kahle njengoba inqobe imidlalo emibili ibhekene neCanada kanye neBelgium, yabe isidlala ngokulingana neCroatia.
Okuyikho okusiza iMorocco ukugaba ngabadlali abaningi abadlala phesheya kwezilwandle, emaqenjini aziwayo emhlabeni. Labo badlali unozinti ovimbe amaphenathi amabili koweSpain uYassine Bounou okwiSevilla yaseSpain, u-Achraf Hakimi okwiParis Saint-Germain (PSG) yaseFrance, uNoussair Mazraoui okwiBayern Munich yaseGermany, uHakimi Ziyech okwiChelsea FC, uSofiane Boufal kwiSouthampton, uRomain Saiss okwiWolverhampton Wanderers FC noNayef Aguerd yena okwiWest Ham wonke la maqembu awase-England. Abanye kukhona uZakaria Aboukhlal wePSV Eindhoven yaseNetherlands, uSofyan Amrabat kwoFiorontina no-Abdelhamid Sabiri kwi-UC Sampdoria okwamaqembu ase-Italy.
Bonke labadlali uWalid Regragui ongumqeqeshi wayo iMorocco, uyababophela ekuqaleni komdlalo nokwenza amazwe athwale kanzima.
Uma kungathiwa iyanqoba kobe iqophe umlando wokuba izwe lokuqala e-Afrika ukudlala amaSemi-Final eNdebe YoMhlaba. Kuyimanje ibalwa namazwe amane aseke afika kumaQuarter-final alo mqhudelwano, yakwenza iCameroon ngowe-1990, iSenegal ngowezi-2002 neGhana ngowezi-2010.
IPortugal okubhekwe kuyona uCristiano “CR7” Ronaldo, ukuzithemba kwayo kusekutheni iza kulo mdlalo ibhodloze iSwitzerland ngamagoli ayisithupha kwelilodwa kowamaQuarter-Finals. Emdlalweni yamaqoqo khona ihlulwe kanye iSouth Korea yanqoba imidlalo emibili ibhekene ne-Uruguay neGhana.
Izwe elizonqoba phakathi kwalamazwe lizotholana nelizonqoba phakathi kweFrance ne-England, okungumdlalo ozobe ubhekwe kakhulu njengoba womabili edlala kahle lamazwe. Kuwona kuzobe kubhekwe uKylian Mbappe weFrance noJude Bellingham we-England, okungabafana abancane abenza kahle kakhulu.