Umkhonto ugwaze ekhaya
Bukhulu ubufakazi obuveza ukuthi impi ese-Ukraine ethinta iRussia namazwe asentshonalanga inomthelela omubi kwipolitiki yesimomazwe kanye nepolitiki yezomnotho emhlabeni jikele.
Kuleli sonto lempi iveze ubungozi bokwanda kwezikhali ngesikhathi kuba nesigameko sokujikijela komcibilisholo okhafula umlilo e-Poland okuyizwe elingaphansi kwe Nato engeyona ingxenye yempi ebhekene mahlanze. Lesi sigameko sihambe nabantu ababili. Kuqale kwasolwa ukuthi lokhu bekuwukuhlasela kweRussia nokuphethe sekuthiwa cha empeleni umcibilisholo i-S-300 air defences uvele e-Ukraine, okuyikuthi umkhonto ugwaze ekhaya.
Lokhu kwenze yavuka injolozela mayelana nokuphakwa kwezikhali ngamazwe asentshonalanga e-Ukraine. Amanye amazwe asenokuzibuza nokwesaba ukuthi ngeke yini i-Ukraine ihlome ize ibe yingozi kumazwe ayihlomisayo.
