Unxenxa abesifazane ukukhuthalela ezamankomane uPhilile
Intokazi esencane uPhilile Ndelu ithi ayikuboni okungayivimba ukuthi imele iNingizimu Afrika emqhudelwaneni iCommonwealth Games.
Kulindeleke ukuthi iqale mhla zingama-28 kuNtulikazi ize isongwe ziyisi-8 kuNcwaba nonyaka, izokuba seBermingham e-England.
UPhilile olwa esibhakeleni sama-amesha ungomunye wabaqokwa eqenjini losomankomane abangama-24 abaqhamuka ezifundazweni ezehlukahlukene. Lo mqhudelwano obizwa nge-2022 Sanabo National Elite Trials, wawubanjelwe eGlencoe Community Hall eduze naseDundee.
Ekhuluma nelaboHlanga uPhilile uthe: “Sekuseduze phambili ukuthi ngikwazi ukufeza iphupho lami lokuthi ngimele iNingizimu Afrika kulo mqhudelwano omkhulu. Ngizimisele kakhulu ukwenza kahle, uma ngingalithola ithuba angingabazi ukuthi ngizobuya nayo indondo ngiphakamise ifulegi lesifundazwe iKwaZulu-Natal neleNingizimu Afrika,” usho kanje.
Le ntokazi ineminyaka yobudala engama-21 idabuka eMlaza esigcemeni sakwa-Q.
Uthe lo mdlalo uwuqale ngonyaka wezi-2013, wabonwa umalume wakhe uSthembiso Nyawo ukuthi umzimba wakhe ungowomuntu wezemidlalo. UNyawo uye wamuyisa kumqeqeshi u-Obed ‘345’ Gumede ukuthi amfundise ngalo mdlalo, kusukela lapho akabange esabheka emumva.
“Angizisoli nhlobo ngesinqumo engasithatha sokuthi ngijoyine lo mdlalo. Ungilekelele ezintweni eziningi impela, izinto ezenziwa intsha eningi yalapha eNingizimu Afrika mina akukho engikwenzayo ngihlezi ngisejimini nje. Lo mdlalo usungihambise izindawo eziningi, buka nje ngathi ngiqala ngabe ngiya eFree State lapho khona kwakunomqhudelwano wezikole. Ngisenezifiso eziningi,” kubeka uPhilile.
Uke wamela elakuleli emqhudelwaneni owaziwa ngeRegion 5 eyabe iseBotswana, ikuSalga Games nakuYouth & Elite Games.
Nyakenye emqhudelwaneni owawubanjelwe eKapa weYouth & Elite Games wabuya nendondo yegolide.
Ubalule ukuthi inhlangano ephethe isibhakela sama-amesha iSouth African National Boxing Organisation (Sanabo) eyenganyelwe uSiyabulela Mkhwalo, imatasa nokumfunela isikole ezikoleni zamabanga aphezulu okuyiMangosuthu University of Technology (MUT) neDurban University of Technology (DUT). Uphilile uthe ufuna ukwenza iTraveling & Tourisim.
Lo somankomane ubonge abe-Elite Athlete Development (Eadp) ngokumnika ithuba lokuthi azilolonge ngemishini eseqophelweni eliphuzulu. Abanye osomankomane aziqeqesha nabo uPhilile kule ndawo enoxhaxha lwemishini uMenzi Hlongwa, uSiza Ngiba, uPhiwokuhle Mnguni noNhlakanipho Kunene.
Eqinjini okuzoqokwa kulona kwabesilisa kukhona uLubaba Lusizi, uSinovuyo Mthintelwa, uTietso Matikinca, uSanele Songcwayi, uMandisile Xhayimpi noSimnikiwe Bongco base-Eastern Cape, u-Alton Gabuza noBonginkosi Nhlapho baseMpumalanga, uWandile Tokota noFranco Rheeder baseWestern Cape kanye noJohn Masamba waseGauteng. Kwabesifazane uVuyolwethu Dila, u-Asanda Ndlebe, uLethokuhle Sibisi, uPamela Manyoni noSiphosethu Daweli base-Eastern Cape, uThandolwethu Mathibe, uPhiwokuhle Mnguni, u-Anele Ndlovu noPhilile baKwaZulu-Natal, uGianne Dicks waseGauteng noMaleko Sithole waseLimpompo.
Leli qembu laseNingizimu Afrika elihlanganisa osomankomane besilisa nabesifazane, lizoqala ikhempu maduze ngaphambi kokulibangisa kumaZone 6 e-Angola azokuba ngenyanga ezayo. Lesi sikwati yisona esizocijelwa ukutholela elakuleli indawo ku-Olympics ezoba seParis, eFrance, ngowezi-2024.
UPhilile uthe ufisa ukumela iNingizimu Afrika kowe-Olympics bese ejoyina isibhakela esikhokhelayo. Esibhakeleni esikhokhelayo khona ufisa ukufike anqobe ibhande lomhlaba.
Ukhuthaze abesifazane ukuthi abawuthande lo mdlalo, ngoba uwubona uwusizo oluningi ungakwazi ukubeka isinkwa etafuleni ngawo. Ukuvulela namathuba amaningi, engabe isesikoleni noma umsebenzi.