Ukungabibikho kwezinye izethenjwa akuyitheni mandla iProteas kweyamaTest
IProteas ilengela engozini yokungena ehlazweni emidlalweni yamaTest. Izobhekana neBangladesh emidlalweni emibili yamaTest ngaphandle kwezethenjwa zabadlali.
UKagiso Rabada, uLungi Ngidi, uMarco Jansen, uRassie Van Der Dussen, no-Aiden Markram angeke babe yingxenye yeqembu elizodlala imidlalo yamaTest.
Bonke bazoyibamba ku-Indian Premier League (IPL).
IProteas izodudulana neBangladesh emidlalweni emibili yamaTest. Owokuqala uzoba ngomhla zingama-31 kuNdasa eKingsmead, eThekwini bese kuthi owesibili udlalelwe eGqeberha eSt.George’s Park ngomhla ziyisishiyagalolunye kuMbasa.
I-IPL izoqala ngoMgqibelo kwelaseNdiya. Zonke lezi zibabuli zabadlali zizobhekisa amabombo e-India namuhla ekuseni.
URabada uthengwe yiKings XI Punjab ngezigidi eziyishumi nesishiyagalombili.
Emlandweni wekhilikithi, elakuleli alikaze lishaywe yiBangladesh emidlalweni yochungechunge lwamaTest.
Njengamanje iBangladesh isethubeni elihle lokuphendula amatafula kwazise iProteas izodlala ngaphandle kwezithenjwa.
Inhloko yethimba labaqoki iProteas uVictor Mpitsang utshele elaboHlanga ukuthi akakhathazekile ngokushaywa ngesithende yizilomo zabadlali.
“Asibabambele gqubu abadlali beqembu lesizwe abakhethe ukuyodlala i-IPL. Lesi yisimo ebesingasihlelele. Ngesikhathi kwakhiwa ikhalenda lemidlalo yethu neBangladesh saqale sabheka ikhalenda le-IPL. Ngaleso sikhathi lalikhomba ukuthi ziqala phakathi noMbasa. Yingakho sathatha isinqumo sokuqala ngemidlalo yosuku olulodwa bese sigcina ngeyamaTest. Yomibili imqoka kithina ngoba kuyisifiso sethu ukwenza kahle kuWorld Test Championship kanti sifuna nokuzibekisela indawo eNdebeni YoMhlaba,” kubeka uMpitsang.
IProteas ihlezi endaweni yesithathu ekuklelisweni kwamazwe kuWorld Test Championship.
“Sihlalile phansi nabadlali sazama ukuthi babeyingxenye yeqembu elizodlala imidlalo yamaTest. Balichazile uhlangothi lwabo. Ekugcineni siphethe ngokuthi sibakhulule ngoba banezinkontileka nala maqembu. Siyethemba ukuthi ngokuzayo i-IPL izokwazi ukusazisa kusenesikhathi ngezingquko ukuze nathi sikwazi ukuhlela kahle. Lesi yisimo ebesingagwemeka. Nokho okwenzekile sekwenzekile. Kunabadlali esibabizile. Asingabazi ukuthi bazokwazi ukwenza umsebenzi. Asikhathazekile,” kuchaza uMpitsang.
UMpitsang nethimba lakhe babize uDean Elgar ongumholi weqembu, uTemba Bavuma, uSarel Erwee, uSimon Harmer, uGlenton Stuurman, uLizaad Williams, uDary Dupavillon, uWiaan Mulder, uKeagan Petersen, uRyan Rickelton, uDuanne Olivier noKhaya Zondo.
“Leli yithuba elihle lokuthi sibone abanye abadlali. Okuhle wukuthi abafana abanjengoLutho Sipamla noStuurman balitholile ithuba lokudlala ngesikhathi sibhekene neNew Zealand. Angeke baze bathuke. Emidlalweni yasekhaya nakhona benza kahle emaqenjini abo.” kusho uMpitsang.
IBangladesh ikhombise ukuba yingozi emidlalweni yosuku ololudwa.
“Ikhono alikaze laba yinkinga eNingizimu Afrika. Sizoya kule midlalo emibili sibheke ukunqoba. Iqembu selikhombisile ukuthi liyakwazi ukunqoba uma libhekene nezimo ezinzima ezindaweni ezahlukene. Sidlale eWest kweyamaTest sanqoba, sabuya seza ekhaya safike sashaya elaseNdiya kwathi ngenyanga edlule sadlala ngokulingana neNew Zealand. Ukuzethemba kuphezulu. Yebo, besingathanda ukuthi sibe nabo bonke abadlali kodwa ngebhadi akusenzekanga.” kuphetha uMpitsang.
