Inkampani emabelemade agwansela ezemidlalo nangale
Inkampani yokubheja iHollywoodbets ifike kwezwakala kwezemidlalo emhlabeni wonke jikelele, abaphathi bayo impela bayadinga ukuba bachonywe uphaphe lwegwalagwala.
IHollywoodbets ngaphandle kokuthi ithuthukise ezemidlalo, ngokuhlukana kwazo kodwa igama layo ilona elihamba phambili kulaba okuthiwa “amaphanta”.
Okuhle ngale nkampani ukuthi ayigcini ngokuthi ilule isandla kuphela emaqenjini aphezulu kodwa iyayihlela nemiqhudelwano emazingeni aphansi. Lokhu ngijwayele ukuba ngikubone ezindaweni zasemakhaya nasemalokishini, ukuthi iyona exhase lowo mqhudelwano.
Kukancane kuphele usuku ungayibonanga imibala ebukhwebezane yakwaHollywoodbets ixhaphake kulona lonke izwe. Okusho ukuthi okuyibo abayimakethayo, bawenza kahle umsebenzi wabo.
EKings Park Stadium:
Le nkundla esetshenziswa iqembu lombhoxo elikhulu esifundazweni iKwaZulu-Natal, iSharks neyaqala ukusebenza ngokusemthethweni ngonyaka we-1958 isibizwa ngeHollywoodbets Kings Park okusho ukuthi le nkampani isinobudlelwano nale nkundla.
IKingsmead Stadium
Nakukhilikithi iHollywoodbets ingenisile njengoba inkundla enkulu esifundazweni iKwaZulu-Natal iKingsmead Stadium, isiyaziwa ngokuthi iHollywoodbets Kingsmead Stadium. Le nkundla isetshenziswa iHollywoodbets Dolphins, kanye neqembu lesizwe iProteas kweminye yemidlalo yamazwe.
Kuneligi yabesifazane yekhilikithi ebizwa ngeHollywoodbets Super League, iphinde ixhase neqembu laKwaZulu-Natal elibizwa ngeKZN Blind Cricket.
Ku-English Premier League (EPL)
IHollywoodbets iphinde yangenisa kule ligi enkulu emhlabeni jikelele ngokuthi yakhe ubudlelwano neqembu elingomakoti, iBrentford. Lobu budlelwano bala maqembu bathulwa ngokusemthethweni ngoNcwaba nyakenye. IBrentford ijezi layo phambili libhaliwe ngamagama amakhulu ukuthi “Hollywoodbets”.
KuSpanish La Liga
Nakule ligi enkulu eSpain iHollywoodbets ingenisile njengoba kukhona ubudlelwano enabo.
KuSAFA Women’s League
Le ligi enkulu yabesifazane yalapha eNingizimu Afrika, eminyakeni edlule ibiyaziwa ngaleli gama elingenhla kodwa manje isibizwa ngokuthi iHollywoodbets Super League. Njengoba isixhaswe yile nkampani le ligi ube khona umehluko kwezezimali, ukuthuthukisa ibhola labesifazane lakuleli.
Kwezamahhashi
Umqhudelwano waminyaka yonke odume kakhulu iVodacom Durban July, usuxhaswe ngokusemthethweni iyona iHollywoodbets. Usuzobizwa ngeHollywoodbets Durban July.
Kwezokusubatha
Ineqembu elibizwa ngeHollywoodbets Athletics Club, ngeledlule emcimbini obuseKings Park Athletics Stadium, eThekwini ibithula abasubathi ezogadla ngabo. Phezulu, eqhulwini kukhona intokazi u-Ann Ashworth oyingqwele yeComrades Marathon yangowezi-2018, uProdigal Khumalo othulwe njengokaputeni weqembu likazwelonke lalesi sikhondlakhondla senkampani. ULoveness Madziva waseZimbabwe onezindondo ezimbili zegolide kuTwo Oceans nowake wanqoba iNongoma Ultra, uNontokozo Mkhize naye onegolide kuSoweto Marathon noMahlomola Sekhonyana naye ohlonishiwayo kulo mjaho. Abanye uCollen Mulaudzi owake walala isithathu kuWorld Student Games nobemele elakuleli kuWorld Half Marathon Championships abengowezi-2020, ePoland, uNkosikhona Mhlwakana obekuMixed Elite nonqobe iBest of Best ngeledlule ebangeni lama-42km. Lo mgijimi oyingqwele yePrince Mangosuthu Ultra Marathon, ngowezi-2019 wamangaza iningi ephuma endaweni ye-11 kuComrades ekubeni ebeqala ukuyigijima nabanye abasubathi.
Le nkampani iphinde ilekelele ngaphandle kwenkundla ngokuthi isize imindeni ehlwempu ngokudla nezinye izinto eziningi.
