Udalula imfihlo ngawasenyakatho nezwekazi i-Afrika uJohnson
Kuvela imfihlo ngokwenza kahle kwamazwe namaqembu asenhla ne-Afrika emiqhudelwaneni emikhulu yeConfederation of African Football (Caf).
Iqembu lesizwe lase-Egypt yilona elihlezi eqhulwini emazweni asesiphakamise kaningi isicoco se-Africa Cup of Nations (Afcon).
Elase-Egypt liphethe izicoco eziyisikhombisa ze-Afcon (1957, 1959, 1986, 1998, 2006, 2008 nangowezi-2010).
UCavin Johnson (osesithombeni) usanda kuhlukana ne-Al Ahly yase-Egypt utshele elaboHlanga engxoxweni ekhethekile ngemfihlo yokwenza kahle kwamaqembu namazwe asenhla ne-Afrika emiqhudelwaneni yeCaf.
“Izwe i-Egypt ngingalibala namazwe ayingcosana angazange abhekane nezinkinga ezithinta ipolitiki. INingizimu Afrika yabhekana nobandlulula iminyaka engaphezu kwekhulu. Amanye amazwe abhekane nenkinga efanayo singabala iGhana, iZimbabwe, iMozambique namanye amazwe engingazange ngiwabale. Wonke la mazwe ahlale enezinkinga zikaHulumeni okuyinto engaziwa e-Egypt,” kuchaza uJohnson.
I-Algeria evikela isicoco se-Afcon isiyinqobe kabili emlandweni wayo bese kuthi iTunisia neMorocco banesicoco esisodwa izwe ngalinye.
“OwabanguMengameli wokuqala ngaphansi kwentando yabantu eNingizimu Afrika, uNelson Mandela wakubeka kwacaca ukuthi ezemidlalo zinamandla okuhlanganisa isizwe. Amazwe asenhla ne-Afrika anomlando omuhle ebholeni futhi abagudluki osikweni lwabo lokwenza izinto ezintweni ezithinta ezemidlalo. Bakuqonda kahle ukuthi ezemidlalo ziletha injabulo ebusweni babo. Lelo siko abakaze balilahle. Basaloke beligcine njalo kwezemidlalo nasendleleni abaphila ngayo njengabantu. Yingakho bezicanasela emiqhudelwaneni emikhulu,” kubeka uJohnson.
Amazwe asenhla ne-Afrika akagcini nje kuphela ngokucanasa ku-Afcon kodwa nasemiqhudelwaneni yamaqembu ayazenzela.
“Amazwe asenhla ne-Afrika ahlale enza ayazenzela kuCaf Champions League, Caf Confederation Cup naku-Africa Cup of Nations (Afcon). Yebo, angiphiki kuyenzeka sibone amazwe afana noNigeria, iCameroon noZambia eyinqoba i-Afcon kwesinye isikhathi kodwa uma ubheka umlando uzoqaphela ukuthi amazwe asenhla ne-Afrika esewunqobe kakhulu lo mqhudelwano. Imvamisa amazwe enza kahle ngenxa yokuthi iningi labadlali bayo basuke bedlala phesheya kwezilwandle. Kulokhu nje ngikhohlwa wukuthi iqembu lesizwe laseMali lizokwenza kahle. IMali inenqwaba yabadlali abagijima phesheya kwezilwandle. Baphila kangcono,” kusho uJohnson.
I-Al Ahly yase-Egypt iyona esiqoqe izicoco eziningi zeCaf Champions League. Iphethe izicoco eziyishumi kanti iyona evikela isicoco esisinqobe amahlandla amabili elandelana.
“I-Egypt, i-Algeria neMorocco babophele iningi la badlali abagijima emazweni abo. Abadlali base-Egypt baphathiswa okoNkulunkulu ezweni labo. Yingakho isikhathi esiningi bengazixaki ngokuya phesheya kwezilwandle. Abadlali bakhona bahola kahle. Lokho kwenza bathathe umhlalaphansi besezingeni eliphezulu nangokwempilo. Kwamanye amazwe uyahamba uyodlala phesheya kodwa uma usubuya ekhaya uphathwa ngendlela efanayo nabanye abadlali.
E-Egypt bayakuphoqa ukuthi uyeke ukudlala ibhola usesimeni esihle nangasezimalini,” kulandisa uJohnson.
Muva nje i-Al Ahly isanda kuphakamisa isicoco seCaf Super Cup ithela othilini iRaja Casablanca yaseMorocco. ICasablanca iyona edle ubhedu kuCaf Confederation Cup.
Iningi labadlali liqala ukuhlelela impilo ngemuva kwebhola lisadlala. Yinto emqoka ebholeni lakhona. Nathi yizinto okumele sinyuse amasokisi kuzona. Yingakho bephila kahle uma sebeyekile ukudlala ibhola,” kuqhuba uJohnson.
IZamalek yase-Egypt iyibambe endaweni yesibili emaqenjini aphethe izicoco eziningi zeChampions League ngezinhlanu.