Kunzima ukuqagela elinganqoba i-AFCON
Lona ngumbuzo obuzwa yizinkumbi zabathandi bezemidlalo e-Afrika yonkana. Intatheli yelaboHlanga, uZipho Singela isibhekela amazwe amahlanu asethubeni lokunqoba isicoco se-Afcon.
Egypt:
ElaseGibhethe liyona eliphethe izicoco eziningi ze-Afcon. Seliwunqobe amahlandla ayisikhombisa lo mqhudelwano. Njengamanje babophele umdlali ohamba phambili Afrika, uMohammed Salah. Wonke amathemba elaseGibhithe azobe ehlezi emahlombe kaSalah. Leli nxele alilibheki ipali eqenjini lalo eligijima ku-English Premier League (EPL), iLiverpool. Okunye okwenza elaseGibhithe libe yizimfivilithi yingoba libophele abadlali abayisishiyagalolunye abayibamba ku-Al Ahly engompetha beCaf Champions League neCaf Super Cup. Ukunqoba yinto esegazini kubona kanti kulindeleke ukuthi basheshe bahlangane uma sebesensimini ngoba bayazana.
Senegal:
Ku-Afcon edlule ebibanjelwe kwelaseGibhithe, iThe Lions of Tharanga yashaywa kowamanqamu ithelwa othulini yi-Algeria. U-Edouard Mendy ovimbela iChelsea egijima ku-English Premier League nguyena unozinti wase-Afrika ohamba phambili emhlabeni njengamanje . Uzoba ukhiye empumelelweni yeSenegal. USadio Mane kuzobe kubhekwe yena ekutheni atholele ezakhe amagoli amqoka. Uma la badlali ababili benza kahle, maningi kakhulu amathuba okuthi iSenegal iwunqobe lo mqhudelwano kulo nyaka ikhonye iAfrika.
Algeria:
I-Algeria iyona evikela isicoco kulo nyaka. Ukuvikela isicoco se-Afcon akuyona into elula. Izwe elagcina ukwenza lokho, ngelaseGibhethe ngowezi-2010. Kusukela lapho alikho elinye izwe eselake lavikela isicoco se-Afcon. Okuhle ngelase-Algeria wukuthi iqembu labo alehlukile kangako kuneqembu abanqobe ngalo i-Afcon eGibhithe ngowezi-2019.
Nigeria:
Ama-Super Eagles abophele esinye sezikwati eziqinile ku-Afcon. Nokho kuzomele adlale njengeqembu uma ezimisele ngokuba ngompetha. Uma engadlala njengeqembu maningi amathuba okuthi lelizwe lidle umhlanganiso kulo mqhudelwano. INigeria igaqele isicoco sayo sesine se-Afcon kulo nyaka. UKelechi Iheanacho kuzobe kubhekwe yena phambili ekutheni aqhululele ezakhe amagoli amqoka phambili. Ngokwedlule i-lelizwe laphuma kowandulela amanqamu.
Cameroon:
Iqale kahle ishaya iBurkina Faso ngamagoli amabili kwelilodwa emdlalweni wokuqala. Ukudlalela ikhaya akungatshazwa ukuthi kuzoyifaka umfutho owengeziwe iCameroon. Ngowezi-2017, iCameroon imangaze inqwaba idla umhlanganiso eGabon ingabhekwe ngumuntu. Kulokho wonke amehlo azobe ethe njo kuyona njengosokhaya. Isisinqobe amahlandla amahlanu lesi sicoco.