IPSL izobalwa namanye azobe emelelekile kowe-AFCON
IPremier Soccer League (PSL) izobalwa namanye amaligi amakhulu azobe emelelekile ku-Africa Cup of Nations (Afcon).
Le ndumezulu yomqhudelwano omkhulukazi webhola ezwenikazi i-Afrika iqale namuhla ngeSonto eCameroon.
Amaligi amakhulu emhlabeni afana no-English Premier League, Spanish La Liga, French Ligue 1, Germany Bundesliga no-Edevirse azobe emelwe ngabadlali abagijima kula malign athathwa njengamakhulu emhlabeni.
NePSL ebalwa namaligi ayishumi ahamba phambili emhlabeni angeke isale ngaphandle kulo mqhudelano.
Intatheli yelaboHlanga, uZipho Singela ibheka abadlali abazobe bemele iPSL ku-Afcon.
Olisa Ndah (Orlando Pirates):
Useqenjini lesizwe laseNigeria. Lesi sitobha sijoyine eZimnyama ekuqaleni kwesizini. Sesifike salenza elaso ijezi phakathi nenkundla emuva. Sikhuluma nje uNdah usephenduke isithandwa sabalandeli bePirates asebeqala ukumfanisa nengwazi yeqembu uMbulelo “Old John” Mabizela. Ama-Super Eagles adlala adlala kuwona azovula ngendumezulo yomdlalo lapho ezobhekana khona nelaseGibhithe kowokuvula ngoMsombuluko. Wonke amehlo abathandi bebhola kuleli azothi no kuyena uNdah.
Daniel Akpeyi (Kaizer Chiefs):
Usephenduke omunye wezinsika eqenjini lesizwe laseGibhithe. Nge-Afcon eyedlule usize ama-Super Eagles afinyelela kowandulela amanqamu. Kulokho uzohlalela ethembeni lokuthi bazohamba base bafinyelele kowamanqamu. Lapha kuPSL lo nozinti uzitamuzela ijezi kuKaizer Chiefs.
Gabadinho Mhango (Orlando Pirates):
Wonke amathemba eMalawi kulo mqhudelwano azobe ehlezi emahlombe kaMhango. Lo mgadli weZimnyama nguyena osize izwe lakhe lazibekisela indawo kulo mqhudelwano. IMalawi iboshelwe eqoqweni elilodwa neSenegal, Guinea neZimbabwe.
Onismor Bhasera (SuperSport United):
UBhasera akuvumi ukuthi aguge yize esehanjelwe yiminyaka. Kunalokho udlalisa okomfana omncane. Isipiliyoni sakhe sizoba ngukhiye eqenjini lesizwe laseZimbabwe kulo mqhudelwano. Ama-Warriors aseqoqweni elilodwa neMalawi, Senegal neGuinea.
Limbikani Mzava (AmaZulu):
Muva nje usanda kusiza Usuthu ekutheni luzibekisele indawo kweyamaqoqo eCaf Champions League. Ukubhekana nezibabuli zabadlali ku-Afcon angeke kumethuse. UMzava useqenjini lesizwe laseMalawi. Kuzomele avimbe izilomo ezifana noKnowledge Musona noSadio Mane weSenegal neLiverpool egijima ku-English Premier League.
Kudakwashe Mahachi (SuperSport United):
Ngemuva kokuphoxeka ku-Afcon eyedlule, uMahachi uzolwela ukusiza iZimbabwe ekutheni idlulele esigabeni somkhumulajezi.