Kukhalwa ngamaphoyisa abakhe umkhanya kutashwa ezitolo
AMANYE amalungu omphakathi nosomabhizinisi bakhala ngokuthi amaphoyisa abahlinzele ezibini abadayisa kubabhikishi abavuke injebovu bantshontsha impahla phezu kwalokho baphinde bacekela phansi nezinsiza egameni lokukhalela ukuboshwa kobenguMengameli wakuleli uMnu uJacob Zuma.
Njengoba ukucekela phansi nokuntshontsha sekuthanda ukulotha ezindaweni eziningi, amanye amalungu omphakathi, osopolitiki nosomabhizinisi bakhomba ngenjumbane amaphoyisa ngokungenzi ngokwanele ukugwema umonakalo odalekile.
Omunye wabantu abazwakalise ukungenami ngamaphoyisa, iMeya kaMasipala wakwaNongoma uMhlonishwa u-Albert Mncwango.
“NgoMsombuluko ngomhla zili-12 kuNtulikazi 2021, ngithole umbiko uvela elungeni lo mphakathi lithi kukhona isigejana sabafana abangeqile eshumini esibukeka kukhona ukuganga esifuna ukukwenza ngaphambi kwakaTops, ngaleso sikhathi leso sigejana besiqongqotha isivalo saseTops ngibe sengithatha ucingo ngifonela amaphoyisa ngathola uColonel othile ngamazisa ukuthi abaphuthume laphana kwaTops eSpar kukhona abafana abazama ukugqekeza njengoba ngikhuluma naye, uColonel ungiphendule ngokuthi bese bezwile ngaleso sehlakalo wangithembisa ukuthi isimo singaphansi kolawulo kuthe emva kwamahora amabili kuya kwamathathu kwaphinde kwangena umbiko othi amaphoyisa awazange afike noma efikile amabili amathathu kodwa afike azimela abukela abafana begqekeza baze bavula kwafika nabanye abantu bazitika bethatha utshwala,” kusho uMncwango.
Uthe leli qulu lisuke kwaTops laya kwesinye isitolo esiseduze laphinde lagqekeza.
“Basuke lapha baya kwesinye isitolo nakhona bazitika ngezimpahla zakhona, nami ngiphume mathupha ngizwa kuthiwa abantu benza umonakalo ngabikela esinye isikhulu samaphoyisa sathembisa ukuthi sizothumela amaphoyisa wathembisa nokuthi uzobuyela kumina, ngibuyele ephoyiseni lokuqala ebengikhulume nalo lakhala ngokuthi abanazo izinsiza zokulwa nobugebengu,” kusho uMncwango.
Ilungu lo mphakathi laseHammarsdale elikhulume nelaboHlanga kodwa lacela ukuthi lingadalulwa ngoba lisaba ukwelekwa ngesoyi lithe amaphoyisa abezibukela ezindaweni eziningi abantu bezitapela izimpahla baze bacekele phansi nezitolo.
“Lapha eHammarsdale iqala le nto ebusuku amaphoyisa akwaMasipala abekhona ezimele emgwaqeni awazange azihluphe ngokunqanda umphakathi ukuthi ungayithathi impahla,” kusho leli lungu lo mphakathi.
Elinye futhi ilungu lo mphakathi uMnu uSanele Shozi waseNtshangwe uthe amaphoyisa anawo amaqhinga okuhlehlisa abantu abasuke bedala uthuthuva emphakathini kodwa wathi kulokhu avele azibukela.
“Nonogada abaqashelwe ukugada izindawo ezingenelwe nabo bavele babaleka abanye bazibukela, abanye bonogada ngibabone nabo sebeyingxenye yalabo abantshontshayo sebekhumule umfaniswano womsebenzi,” kusho uShozi.
Uthe uyasola ukuthi amaphoyisa abenikwe umyalelo wokuthi angasiqinisi isandla ngoba iningi lawo belizibukela.
“Amaphoyisa ahlulwe ezinye izinkampani zonogada ezikwazile ukunqanda ababhikishi ukuba bangene ezinkampanini abazigadile,” kusho uShozi.
Uthe amaphoyisa aze aqala ukuqinisa isandla akwazi ukuhlehlisa ababhikishi kwezinye izindawo emveni kokubona umonakalo omkhulu obusudalekile.